ചെറുവത്തൂര്‍: 'അര്‍ച്ചനയ്‌ക്കൊരു കൂട്ടു വേണം' കൂടെയിരുന്ന് പഠിക്കാന്‍ മറ്റാരുമില്ലാതെ ഒന്നാം തരത്തില്‍ തനിച്ചിരുന്നു അര്‍ച്ചന. ഒരു കുട്ടി മാത്രം പ്രവേശനം നേടിയ കാസര്‍കോട് ചെറിയാക്കര ഗവ.എല്‍ പി സ്‌കൂളിനെ കുറിച്ചുള്ള ഈ വാര്‍ത്ത 'സുപ്രഭാതം' പ്രസിദ്ധീകരിച്ചത് മൂന്ന് വര്‍ഷം മുന്‍പാണ്. എന്നാല്‍ കുട്ടികളില്ലാത്ത വിദ്യാലയമെന്ന ദുഷ്‌പേര് ഈ സര്‍ക്കാര്‍ വിദ്യാലയം മായ്ച്ചുകളയുകയാണ്. ഇത്തവണ ഒന്നാം തരത്തിലേക്ക് എത്തുന്നത് 14 കുട്ടികള്‍. വിദ്യാലയത്തിലെ ആകെ കുട്ടികളുടെ എണ്ണം 44 ല്‍ എത്തി നില്‍ക്കുന്നു.

സ്വന്തം വിദ്യാലയത്തിന്റെ തളര്‍ച്ചയില്‍ മനസ് വേദനിച്ച നാട്ടുകാരും, അധ്യാപകരും ഒരു മനസോടെ കൈകോര്‍ത്തപ്പോള്‍ കുട്ടികളുടെ എണ്ണം മാത്രമല്ല വര്‍ധിച്ചത്. വിദ്യാലയം തന്നെ അടിമുടി മാറിക്കഴിഞ്ഞു.കുരുന്നു മനസുകളെ കുളിരണിയിക്കാന്‍ വര്‍ണ്ണം വാരിവിതറിയ ചുമരുകള്‍. ഹരിതപന്തലും , ചെറുജലാശയവുമുള്‍പ്പെടെയുള്ള കുട്ടികളുടെ പാര്‍ക്ക്. പച്ചക്കറി കൃഷി,പഠന നിലവാരമുയര്‍ത്താന്‍ ആധുനിക രീതിയിലുള്ള പഠനസംവിധാനങ്ങള്‍. അടിമുടി മാറികൊണ്ട് ഉപജില്ലാ പ്രവേശനോത്സവത്തിന് വേദിയാവുകയാണ് ചെറിയാക്കര.
ആരവങ്ങളൊന്നുമില്ലാത്ത പ്രവേശനോത്സവമായിരുന്നു കഴിഞ്ഞ വര്‍ഷം വരെ. ഇത്തവണ നാട്ടുകാരെല്ലാം ഒരാഴ്ചയായി വിദ്യാലയത്തിലുണ്ട്. പുതുതായി പ്രവേശനം നേടിയ കുട്ടികളെല്ലാം ഒരുക്കം എന്ന പേരില്‍ ഒത്തുചേര്‍ന്നു. അമ്മമാര്‍ നിര്‍മ്മിച്ച കുടകളാണ് നവാഗതര്‍ക്ക് സമ്മാനം.
ബാന്റ് മേളം ഉള്‍പ്പെടെ നാട്ടുകാരെല്ലാം അണിനിരക്കുന്ന ഘോഷയാത്രയുണ്ട് പ്രവേശനോത്സവദിനത്തില്‍.
കഴിഞ്ഞ മൂന്ന് വര്‍ഷമായി കൃത്യമായ കര്‍മ പദ്ധതിയുണ്ടാക്കി മുന്നേറുകയായിരുന്നു ചെറിയാക്കര. സ്‌കൂളിന്റെ മുഖച്ഛായ മാറ്റണമെന്ന് പി.ടി.എ കമ്മിറ്റി തീരുമാനിച്ചു. നാട്ടുകാരുടെ യോഗം വിളിച്ചു ചേര്‍ത്തു. എല്ലാവരും മുന്നിട്ടിറങ്ങി.

പിന്നീട് കണ്ടത് അത്ഭുതപ്പെടുത്തുന്ന മാറ്റങ്ങള്‍. സ്‌കൂള്‍ ചുമരുകള്‍ വര്‍ണാഭമായി. ക്ലാസ് മുറികളില്‍ ആധുനിക സംവിധാനങ്ങള്‍ ഒരുക്കി.
ചുറ്റുമതില്‍ ഉയര്‍ന്നു തുടങ്ങി. കളിയുപകരണങ്ങള്‍ ഉള്‍പ്പെടെയുള്ള പാര്‍ക്ക് ഒരുങ്ങി. സ്‌കൂളിലെ ഓരോ പരിപാടിയിലും നാട്ടുകാരുടെ സജീവപങ്കാളിത്തം. പൂര്‍വ വിദ്യാര്‍ഥി സംഗമത്തില്‍ പങ്കെടുക്കാനെത്തിയത് നാന്നൂറോളം പേര്‍.
എല്ലാവരും തങ്ങളാലാവുന്ന സാമ്പത്തിക സഹായം നല്‍കുകയും ചെയ്തു. സ്‌കൂളിന് പൂര്‍വ വിദ്യാര്‍ഥികള്‍ വാഹനം വാങ്ങി നല്‍കിയതോടെ യാത്രാപ്രശ്‌നത്തിനും പരിഹാരമായി. ഇതോടെ കൂട്ടായ്മയുടെ വിജയഗാഥയായി മാറുകയാണ് ഈ വിദ്യാലയത്തിന്റെ മുന്നേറ്റം.