ടോറിനോ: യുവേഫ ചാംപ്യന്‍സ് ലീഗിന്റെ രണ്ടാം പാദ സെമിയിലും കരുത്തു കാട്ടി യുവന്റസ്. സ്വന്തം തട്ടകത്തില്‍ നടന്ന പോരാട്ടത്തില്‍ ഒന്നിനെതിരേ രണ്ടു ഗോളുകള്‍ക്കാണ് മൊണാക്കോയെ ടീം പരാജയപ്പെടുത്തിയത്. ഇരുപാദങ്ങളിലുമായി 4-1 എന്ന സ്‌കോറിനാണ് യുവന്റസിന്റെ വിജയം. മരിയോ മാന്‍സുക്കിച്ച്, ഡാനി ആല്‍വസ് എന്നീ തകര്‍പ്പന്‍ ഗോളുകളാണ് രണ്ടാം പാദത്തില്‍ യുവന്റസിന് തുണയായത്. 

ഇരുടീമുകളും പതിയെ ആണ് കളി ആരംഭിച്ചത്. എന്നാല്‍ മൊണാക്കോ അതിവേഗം കളിയില്‍ വേഗത കൊണ്ടുവന്നു. കൈലിയന്‍ എംബാപെയുടെ തകര്‍പ്പനൊരു ഷോട്ട് യുവന്റസ് ഗോളി ജിയാന്‍ ലൂയിജി ബഫണിനെ ഭേദിച്ചെങ്കിലും പോസ്റ്റില്‍ തട്ടി മടങ്ങി. ഇതോടെ യുവന്റസ് അപകടം മണത്തു. 10ാം മിനുട്ടില്‍ സമി ഖെദീരയ്ക്ക് പരുക്കേറ്റതോടെ യുവന്റസിന് മറ്റൊരു തിരിച്ചടി നേരിട്ടു. പകരക്കാരനായി ക്ലോഡിയോ മര്‍ച്ചീസിയോ കളത്തിലിറങ്ങി. എന്നാല്‍ മൊണാക്കോ നിരന്തരം ആക്രമണങ്ങള്‍ തുടര്‍ന്നു.
വീഴ്ച്ചകളില്‍ നിന്ന് പതിയെ യുവന്റസ് കരകയറുന്നതാണ് പിന്നീട്കണ്ടത്. ഗോണ്‍സാലോ ഹിഗ്വയ്‌ന്റെയും മരിയോ മാന്‍സുക്കിച്ചിന്റെയും ഷോട്ടുകള്‍ ഡാനിയല്‍ സുബാസിച്ച് കഷ്ടപ്പെട്ടാണ് സേവ് ചെയ്തത്. 33ാം മിനുട്ടില്‍ യുവന്റസ് അക്കൗണ്ട് തുറന്നു. ആല്‍വസായിരുന്നു ഗോളിന് അവസരമൊരുക്കിയത്. താരത്തിന്റെ തകര്‍പ്പനൊരു ക്രോസില്‍ മാന്‍സൂക്കിച്ച് ഷോട്ടുതിര്‍ത്തെങ്കിലും സുബാസിച്ച് തട്ടിയകറ്റി. റീബൗണ്ടില്‍ താരം പന്ത് ലക്ഷ്യത്തിലെത്തിക്കുകയായിരുന്നു.
ഗോള്‍ വഴങ്ങിയതോടെ മൊണാക്കോ തിരിച്ചടിക്കാന്‍ തുടങ്ങി. എംബാപെയുടെയും ഫാല്‍ക്കാവോയുടെയും ഷോട്ടുകള്‍ ലക്ഷ്യത്തിലെത്തിയില്ല. ഗോള്‍ നിരക്ക് വര്‍ധിപ്പിക്കാന്‍ പൗലോ ഡൈബാലയ്ക്ക് അവസരം ലഭിച്ചെങ്കിലും താരത്തിന് മുതലാക്കാന്‍ സാധിച്ചില്ല. എന്നാല്‍ സുബാസിച്ച് സേവ് ചെയ്ത പന്തില്‍ ബുള്ളറ്റ് ഷോട്ട് പായിച്ച് ആല്‍വസ് യുവന്റസിന്റെ രണ്ടാം ഗോള്‍ സ്വന്തമാക്കി. രണ്ടാം പകുതിയില്‍ തിരിച്ചടിക്കാന്‍ മൊണാക്കോ ശ്രമങ്ങള്‍ നടത്തി. 69ാം മിനുട്ടില്‍ എംബാപെയിലൂടെ അവര്‍ ഒരു ഗോള്‍ മടങ്ങി. എന്നാല്‍ പിന്നീട് അവസരങ്ങള്‍ ഒന്നൊന്നായി നഷ്ടപ്പെടുത്തി ടീം തോല്‍വിയിലേക്ക് വീഴുകയായിരുന്നു.
അതേസമയം ഇത് ആറാം തവണയാണ് യുവന്റസ് ഫൈനലില്‍ കടക്കുന്നത്. എ.സി മിലാന്റെ റെക്കോര്‍ഡിനൊപ്പമെത്താനും ഇതിലൂടെ യുവന്റസിന് സാധിച്ചു.