മനാമ: ബഹ്‌റൈനില്‍ മനുഷ്യക്കടത്ത് തടയാനുള്ള വിപുലമായ സംവിധാനങ്ങളുമായി അധികൃതര്‍ രംഗത്ത്. ഇതിന്റെ ഭാഗമായി മനുഷ്യക്കടത്തിന് വിധേയരാവുന്ന ഇരകള്‍ക്കായി 'റഫറല്‍ സംവിധാനം' ഏര്‍പ്പെടുത്തുമെന്ന് സര്‍ക്കാര്‍ അധികൃതര്‍ വ്യക്തമാക്കി.
ദേശീയ മനുഷ്യക്കടത്ത് വിരുദ്ധ സമിതിയുടെ കീഴിലാണ് പദ്ധതി നടപ്പാക്കുന്നത്. ഇതോടെ ഗള്‍ഫ് മേഖലയില്‍ മനുഷ്യക്കടത്തിന് ഇരയാകുന്നവര്‍ക്കായി റഫറല്‍ സംവിധാനം ഏര്‍പ്പെടുത്തുന്ന ആദ്യ രാജ്യമായി ബഹ്‌റൈന്‍ മാറും. 2008ല്‍ മനുഷ്യക്കടത്തിനെതിരേ നിയമം പാസാക്കിയ രാജ്യമാണ് ബഹ്‌റൈന്‍.
മനുഷ്യക്കടത്ത് തടയുന്നതിന് 160 രാജ്യങ്ങളുമായി ബന്ധപ്പെട്ട് 460 ഓഫിസുകള്‍ പ്രവര്‍ത്തിക്കുന്നുണ്ടെന്ന് ഇന്റര്‍നാഷനല്‍ ഓര്‍ഗനൈസേഷന്‍ ഫോര്‍ മൈഗ്രേഷന്‍(ഐ.ഒ.എം) റീജ്യനല്‍ പ്രൊജക്ട് മാനേജ്‌മെന്റ് ഡയറക്ടര്‍ മുഹമ്മദ് അസ്സര്‍ഖാനി വിശദീകരിച്ചു.
കഴിഞ്ഞ ദിവസം എല്‍.എം.ആര്‍.എ കേന്ദ്രത്തില്‍ നടന്ന ഇതു സംബന്ധിച്ച പ്രഖ്യാപന ചടങ്ങില്‍ ജി.സി.സി തല യു.എന്‍ ആന്റി ഡ്രഗ് ആന്‍ഡ് ക്രൈം ഓഫിസ് മേധാവി ഡോ. ഹാതിം അലി, മുഹമ്മദ് അസ്സര്‍ഖാനി, മനുഷ്യക്കടത്ത് വിരുദ്ധ സമിതി അംഗങ്ങള്‍, ഉന്നത ഉദ്യോഗസ്ഥര്‍, നയതന്ത്രജ്ഞര്‍ പങ്കെടുത്തു.