റിയാദ്: കിഴക്കൻ സഊദിയിലെ ജുബൈലിൽ മലയാളിയെ താമസസ്ഥലത്ത് മരിച്ച നിലയിൽ കണ്ടെത്തി. ആലപ്പുഴ ചിങ്ങോലി കീരിക്കാട് കൈമൂട്ടില്‍ തെക്കേതില്‍ വീട്ടില്‍ അനസ് ഫിറോസ് ഖാന്‍ (43) ആണ് മരിച്ചത്. രണ്ടു വര്‍ഷമായി സഊദിയിലുള്ള അനസ് ജുബൈലിലെ മുസാദ് അല്‍-സൈഫ് കമ്പനിയില്‍ പ്രൊജക്റ്റ് മാനേജരാണ്.

     കഴിഞ്ഞ വെള്ളിയാഴ്ച വൈകിട്ട് മുതല്‍ ഫോണില്‍ കിട്ടാഞ്ഞതിനെ തുടര്‍ന്നുള്ള അന്വേഷണത്തിലാണ് മരണ വിവരം പുറത്തറിയുന്നത്. താമസസ്ഥലത്ത് മരിച്ച നിലയില്‍ കണ്ടെത്തിയ ഇദ്ദേഹത്തെ പോലീസ് എത്തിയാണ് ജുബൈല്‍ ജനറല്‍ ആശുപത്രിയിലേക്ക് മാറ്റിയത്. ഹൃദയാഘാതമാണ് മരണകാരണമെന്നാണ് പ്രാഥമിക നിഗമനം.

    ജിദ്ദയിലുള്ള സഹോദരി ഭര്‍ത്താവ് സ്വാലിഹ് ജുബൈലിലേക്ക് പുറപ്പെട്ടിട്ടുണ്ട്. അദ്ദേഹം എത്തിയാലുടന്‍ ഇവിടെത്തന്നെ ഖബറടക്കുമെന്ന് ബന്ധപെട്ടവർ അറിയിച്ചു. സന്നദ്ധ പ്രവര്‍ത്തകന്‍ സലിം ആലപ്പുഴ, അരുണ്‍ കല്ലറ എന്നിവരുടെ നേതൃത്വത്തില്‍ നടപടിക്രമങ്ങള്‍ തുടങ്ങി. ഭാര്യ: ജാസ്മിന്‍, മക്കള്‍: ആബിദ്, ആയിഷ. സഹോദരി അനീഷ (ജിദ്ദ).