ജിദ്ദ: ലോകം ഉറ്റുനോക്കുന്ന ഇസ്ലാമിക്, ഗള്‍ഫ്, അറബ് ഉച്ചകോടികള്‍ക്ക് പുണ്യഭൂമിയില്‍ ഉജ്വല തുടക്കം. സല്‍മാന്‍ രാജാവിന്റെ അധ്യക്ഷതയില്‍ രണ്ടുദിവസമായി മക്കയില്‍ നടക്കുന്ന മൂന്നു ഉച്ചകോടികള്‍ക്കാണ് വ്യഴാഴ്ച തുടക്കം കുറിച്ചത്. പ്രധാനമായും ഗള്‍ഫ് മേഖലയിലെ സുരക്ഷാ സ്ഥിതിഗതികളും ഇറാനുയര്‍ത്തുന്ന ഭീഷണി എങ്ങിനെ ചെറുക്കുമെന്നതാണ് പ്രധാന ചര്‍ച്ച. ജി.സി.സി ഉച്ചകോടി അംഗങ്ങളായി ആറ് രാഷ്ട്രങ്ങളില്‍ നിന്നുള്ള പ്രതിനിധികളാണ് പങ്കെടുത്തുത്.
മറ്റു രാഷ്ട്രങ്ങളുടെ കാര്യങ്ങളിലുള്ള ഇറാന്റെ ഇടപെടലിനെ ഇസ്‌ലാമിക രാഷ്ട്രങ്ങള്‍ ഒറ്റക്കെട്ടായി എതിര്‍ക്കണമെന്ന് സഊദി അറേബ്യ ആവശ്യപ്പെട്ടു. ഓര്‍ഗനൈസേഷന്‍ ഓഫ് ഇസ്‌ലാമിക് കോ ഓപറേഷന്‍ (ഒ.ഐ.സി) ഉച്ചകോടിയുടെ ഭാഗമായി നടന്ന വിദേശ കാര്യമന്ത്രിതല യോഗത്തിലാണ് സഊദി വിദേശകാര്യമന്ത്രി ഇബ്രാഹിം അല്‍ അസ്സാഫാണ് ആവശ്യം മുന്നോട്ട് വച്ചത്.
മറ്റ് രാഷ്ട്രങ്ങളിലുള്ള അനാവശ്യ ഇടപെടലിന്റെ തെളിവാണ് ഇറാന്റെ പിന്തുണയുള്ള യമനിലെ ഹൂതികള്‍. അരാംകോ എണ്ണക്കുഴലുകള്‍ക്ക് നേരെ നടന്ന ഹൂതി ഭീകരാക്രമണത്തിനെതിരേ യോഗത്തില്‍ സഊദി അറേബ്യ ശക്തമായ പ്രതിഷേധം രേഖപ്പെടുത്തി. ഇറാന്റെ പിന്തുണയാണ് ഹൂതികള്‍ക്ക് ആക്രമണത്തിന് കരുത്തു പകരുന്നത്. സിറിയന്‍ വിഷയത്തില്‍ രാഷ്ട്രീയ പരിഹാരം ആവശ്യമാണെന്നും സഊദി അറേബ്യ ആവശ്യപ്പെട്ടു.
ഒ.ഐ.സി 14ാമത് ഉച്ചകോടിക്കെത്തിയ മുഴുവന്‍ നേതാക്കളെയും സല്‍മാന്‍ രാജാവ് സ്വീകരിച്ചു. ഖത്തര്‍ പ്രധാനമന്ത്രി ശൈഖ് അബ്ദുല്ല ബിന്‍ നാസര്‍ ബിന്‍ ഖലീഫ അല്‍ഥാനിയും ജി.സി.സി ഉച്ചകോടിയില്‍ സംബന്ധിച്ചു. ഉപരോധം നിലവില്‍ വന്നശേഷം ആദ്യമായാണ് പ്രധാനപ്പെട്ട ഖത്തര്‍ പ്രതിനിധി സഊദിയില്‍ എത്തുന്നതും പ്രധാന യോഗത്തില്‍ പങ്കെടുക്കുന്നതും.
അതേ സമയം നാളെ നടക്കുന്ന ഓര്‍ഗനൈസേഷന്‍ ഓഫ് ഇസ്ലാമിക് കോര്‍പറേഷന്റെയും 'ഭാവിയിലേക്ക് ഒരുമിച്ച്' എന്ന തലക്കെട്ടില്‍ നടക്കുന്ന ഉച്ചകോടിയില്‍ മുസ്ലിംകള്‍ക്കെതിരേ ആഗോള തലത്തില്‍ നടക്കുന്ന പ്രചാരണങ്ങളും പ്രശ്നങ്ങളും ചര്‍ച്ചയാകും. ഫലസ്തീന്‍, സിറിയ വിഷയങ്ങളും ഇസ്ലാമോഫോബിയ പ്രതിരോധിക്കാനുള്ള നടപടികളും ചര്‍ച്ചയാകും. ഉച്ചകോടിയില്‍ 57 രാഷ്ട്രത്തലവന്മാര്‍ പങ്കെടുക്കും. ഇതിനു ശേഷം ഈ രണ്ട് ഉച്ചകോടികളുടേയും ചര്‍ച്ചാ വിഷയങ്ങള്‍ വിശദമായി ചര്‍ച്ച ചെയ്യുന്ന ഇസ്‌ലാമിക രാഷ്ട്രങ്ങളുടെ ഉച്ചകോടിയും ചേരും. അതേ സമയം അറബ്, മുസ്ലിം ലോകത്ത് സഊദി അറേബ്യക്കുള്ള വലിയ സ്ഥാനത്തിന് തെളിവാണെന്ന് ഓര്‍ഗനൈസേഷന്‍ ഓഫ് ഇസ്ലാമിക് കോ ഓപറേഷന്‍ സെക്രട്ടറി ജനറല്‍ ഡോ. യൂസുഫ് അല്‍ഉസൈമിന്‍ പറഞ്ഞു. ഇസ്ലാമിക് ലോകത്തെ പ്രശ്നങ്ങള്‍ക്ക് പരിഹാരം കാണുന്നതിന് സഹായകമാകുന്ന സുപ്രധാന തീരുമാനങ്ങള്‍ ഉച്ചകോടിയിലുണ്ടാകുമെന്ന് പ്രതീക്ഷിക്കുന്നു. ഇസ്ലാമിക രാജ്യങ്ങളുടെ ആഭ്യന്തര കാര്യങ്ങളിലുള്ള ഇടപെടലുകള്‍, ഭീകരത, തീവ്രവാദം, ഇസ്ലാം ഭീതി അടക്കമുള്ള പ്രശ്നങ്ങള്‍ ഉച്ചകോടിയില്‍ വിശകലനം ചെയ്യുമെന്നും ഒ.ഐ.സി സെക്രട്ടറി ജനറല്‍ പറഞ്ഞു. നിരവധി രാജ്യങ്ങളില്‍ മുസ്ലിംകള്‍ക്കെതിരായ ആക്രമണങ്ങള്‍ വര്‍ധിക്കുന്നതിന് ഇസ്ലാമോഫോബിയ കാരണമായിട്ടുണ്ടെന്നും ഡോ. യൂസുഫ് അല്‍ഉസൈമിന്‍ പറഞ്ഞു. അതേ സമയം അറബ്, ഇസ്‌ലാമിക രാഷ്ട്ര നേതാക്കള്‍ എത്തിച്ചേര്‍ന്നതോടെ അതീവ സുരക്ഷയും കര്‍ശന ഗതാഗത നിയന്ത്രണവുമാണ് മക്കയില്‍.