തൊട്ടില്‍പ്പാലം: കാവിലുംപാറ പഞ്ചായത്തില്‍ വേനല്‍മഴയ്ക്കിടെയുണ്ടായ ശക്തമായ കാറ്റില്‍ കൃഷിനാശവും നിരവധി വീടുകള്‍ക്ക് കേടുപാടുകളും സംഭവിച്ചു. മണിക്കൂറുകളോളം വൈദ്യുതി തടസവുമുണ്ടായി.
പഞ്ചായത്തിലെ നാഗംപാറ, പൊയിലോംചാല്‍, കൂടലില്‍, ചീത്തപ്പാട് എന്നിവിടങ്ങളിലാണ് മഴയിലും ശക്തമായ കാറ്റിലും നിരവധി വീടുകള്‍ക്കും ഏക്കര്‍കണക്കിന് കൃഷിസ്ഥലങ്ങള്‍ക്കും നാശനഷ്ടമുണ്ടായത്. കഴിഞ്ഞ ദിവസം രാത്രിയോടെ തുടങ്ങിയ കനത്തമഴയും ഇടിമിന്നലും ചുഴലിക്കാറ്റുമാണ് കൃഷിനാശം വിതച്ചത്.
    കൂടലില്‍ എള്ളില്‍പൊയില്‍ രാജന്‍, വി.സി കുമാരന്‍ എന്നിവരുടെ നൂറിലധികം നേന്ത്രവാഴകളും പടുവാഴകളും നശിച്ചു.
 പൊയിലോംചാലില്‍ പഞ്ചായത്ത് പ്രസിഡന്റ് അന്നമ്മ ജോര്‍ജിന്റേതടക്കം ഗ്രാമ്പു, ജാതി മുതലായവ വ്യാപകമായി നശിച്ചിട്ടുണ്ട്. വിവിധയിടങ്ങളിലെ കുടുംബശ്രീ യൂനിറ്റുകളുടെ ആയിരക്കണക്കിന് മരച്ചീനി, വാഴ എന്നിവയും നശിച്ചു.    നാഗംപാറയില്‍ പഞ്ചായത്ത് വൈസ് പ്രസിഡന്റ് പി.പി ചന്ദ്രന്റെ വീടിനുമുകളില്‍ തെങ്ങ് കടപുഴകി വീണ് വീടിന്റെ മേല്‍ക്കൂരയ്ക്ക് ഭാഗികമായ കേടുപറ്റി.
ഈ ഭാഗത്തു മറ്റ് ആറോളം വീടുകള്‍ക്കും സാരമായ നാശനഷ്ടമുണ്ടായിട്ടുണ്ട്.  
    മരങ്ങള്‍ കടപുഴകി വൈദ്യുതി ലൈനുകള്‍ തകര്‍ന്ന് കൂടലില്‍, കരിങ്ങാട്, ചൊത്തക്കൊല്ലി, മൂന്നാംകൈ തുടങ്ങി വിവിധയിടങ്ങളില്‍ മണിക്കൂറുകള്‍ വൈദ്യുതി മുടങ്ങി. വൈദ്യുതി പുനഃസ്ഥാപിക്കാനായി രാവിലെ തുടങ്ങിയ കെ.എസ്.ഇ.ബി ജീവനക്കാരുടെ ശ്രമം വൈകുന്നേരത്തോടെയാണ് പൂര്‍ത്തിയായത്. കടുത്ത വേനല്‍ ചൂടിന് തെല്ലൊരാശ്വാസമായി മഴപെയ്‌തെങ്കിലും വ്യാപകകൃഷിനാശവും വീടുകള്‍ക്ക് കേടുപാട് സംഭവിച്ചതും കര്‍ഷകര്‍ ഏറെ ദുരത്തിലാണ്.
മരുതോങ്കര, നരിപ്പറ്റ, കായക്കൊടി, കുറ്റ്യാടി, വേളം പഞ്ചായത്തുകളിലും വ്യാപകമായ കൃഷി നാശമുണ്ടായിട്ടുണ്ട്