ന്യൂഡല്‍ഹി: രാജ്യത്ത് കൊവിഡ് വ്യാപനത്തിന്റെ തോത് നിയന്ത്രിക്കാനായെന്ന് കേന്ദ്രസര്‍ക്കാര്‍. തുടര്‍ച്ചയായ നാലു ദിവസമായി കൊവിഡ് സ്ഥിരീകരിക്കുന്നവരുടെ നിരക്ക് എട്ടു ശതമാനത്തില്‍ താഴെയായി തുടരുന്നതിന്റെ അടിസ്ഥാനത്തിലാണ് കേന്ദ്രസര്‍ക്കാരിന്റെ അവകാശവാദം.

ഇന്ന് 55.000 പേര്‍ക്കാണ് കോവിഡ് സ്ഥിരീകരിച്ചത്. കഴിഞ്ഞ ഏതാനും ദിവസമായി കൊവിഡ് രോഗികളുടെ എണ്ണം കുറഞ്ഞുവരികയാണ്. നിലവില്‍ പോസിറ്റീവിറ്റി നിരക്ക് 7.94 ശതമാനമാണ്. ഇത് കാണിക്കുന്നത് രോഗവ്യാപനത്തില്‍ കുറവ് സംഭവിച്ചു എന്നാണെന്നും കേന്ദ്ര ആരോഗ്യമന്ത്രാലയം പ്രസ്താവനയില്‍ പറഞ്ഞു.

പരിശോധനകളുടെ എണ്ണം ഉയര്‍ന്നതാണ് പോസിറ്റീവിറ്റി നിരക്ക് കുറയാന്‍ സഹായകമായത്. പരിശോധനകളുടെ എണ്ണം ഉയര്‍ന്നതോടെ, തുടക്കത്തില്‍ തന്നെ രോഗികളെ കണ്ടെത്തി ചികിത്സ നല്‍കാന്‍ സാധിച്ചു. കൂടാതെ കോണ്‍ടാക്ട് ട്രേസിങ് ഉള്‍പ്പെടെയുളള കൊവിഡ് പ്രതിരോധ പ്രവര്‍ത്തനങ്ങള്‍ ഫലപ്രദമായി നിര്‍വഹിച്ചതുമാണ് രോഗവ്യാപനം കുറയാന്‍ ഇടയാക്കിയതെന്ന് കേന്ദ്രസര്‍ക്കാര്‍ വ്യക്തമാക്കുന്നു.

നിലവില്‍ പരിശോധനകളുടെ എണ്ണം 9.5 കോടിയായി ഉയര്‍ന്നിരിക്കുകയാണ്. രാജ്യത്ത് കൊവിഡ് ബാധിച്ച് ചികിത്സയില്‍ കഴിയുന്ന രോഗികളുടെ എണ്ണം എട്ടുലക്ഷത്തില്‍ താഴെയാണ്.