തിരുവനന്തപുരം: നാട്ടിന്‍പുറത്തെ അങ്കണവാടികള്‍ സ്‌കൂളുകളിലേക്ക് മാറ്റാനൊരുങ്ങുന്നു. സംസ്ഥാനത്ത് പ്രീ പ്രൈമറി വിദ്യാഭ്യാസ മേഖല ശക്തിപ്പെടുത്തുന്നതിന്റെ ഭാഗമായാണ് അങ്കണവാടികളെ സ്‌കൂളുകളിലേക്ക് പറിച്ചുനടാന്‍ സര്‍ക്കാര്‍ ആലോചിക്കുന്നത്. ഖാദര്‍ കമ്മിറ്റി റിപ്പോര്‍ട്ട് നടപ്പിലാക്കുന്നതിന്റെ രണ്ടാം ഘട്ടത്തില്‍ ഇതു സംബന്ധിച്ച് തീരുമാനമുണ്ടാകും. സംസ്ഥാനത്തെ എല്ലാ പൊതുവിദ്യാലയങ്ങളിലും പ്രീ പ്രൈമറി ആരംഭിച്ച് നിലവിലെ അങ്കണവാടികള്‍ ഇതിനടുത്തേക്ക് മാറ്റും. ഇവയ്ക്കായി ആകര്‍ഷകമായ കെട്ടിടവും ഒരുക്കും. യോഗ്യതയുള്ള അധ്യാപകരെ ഉള്‍പ്പെടെ നിയമിക്കാനും ആലോചനയുണ്ട്.
വിദ്യാഭ്യാസ രംഗത്ത് ഒട്ടേറെ പുരോഗതി കൈവരിച്ച കേരളത്തില്‍ അടിത്തട്ടായ പ്രീ പ്രൈമറി രംഗം യാതൊരു വ്യവസ്ഥകളും കൂടാതെ നിലനില്‍ക്കുന്നതിനെതിരേ വിമര്‍ശനമുയര്‍ന്നിരുന്നു. പ്രീ പ്രൈമറി വിദ്യാഭ്യാസ മേഖല വ്യവസ്ഥാപിതമാക്കണമെന്ന ആവശ്യവും നാളുകളായി ഉയരുന്നുണ്ട്. സര്‍ക്കാര്‍ നടപ്പിലാക്കാന്‍ ഉദ്ദേശിച്ചിട്ടുള്ള ഖാദര്‍ കമ്മിറ്റി റിപ്പോര്‍ട്ടിലും ഇതു സംബന്ധിച്ച നിര്‍ദേശമുണ്ട്. പ്രീ പ്രൈമറി മേഖലയ്ക്കായി പ്രത്യേക നയരൂപീകരണം ഉള്‍പ്പെടെയുള്ള കാര്യങ്ങളാണ് സര്‍ക്കാര്‍ ലക്ഷ്യമിടുന്നത്.
സംസ്ഥാനത്ത് 54 സര്‍ക്കാര്‍ പ്രീ പ്രൈമറി വിദ്യാലയങ്ങളാണുള്ളത്. ഈ സ്‌കൂളുകളില്‍ യോഗ്യതയുള്ള അധ്യാപകരും മറ്റു സംവിധാനങ്ങളും സര്‍ക്കാര്‍ ഒരുക്കിയിട്ടുണ്ട്. അതേസമയം, കേരളത്തിലെ 2000ത്തിലധികം സ്‌കൂളുകളില്‍ സര്‍ക്കാര്‍ അംഗീകൃത പ്രീ പ്രൈമറികള്‍ പ്രവര്‍ത്തിക്കുന്നു. അത്തരം സ്ഥാപനങ്ങളില്‍ 30 കുട്ടികള്‍ക്ക് ഒരു ടീച്ചറും ഒരു ആയയും വീതം സര്‍ക്കാര്‍ ഓണറേറിയം കൈപ്പറ്റിയാണ് ജോലി ചെയ്യുന്നത്. എന്നാല്‍ അധ്യാപക-രക്ഷാകര്‍തൃ സമിതികള്‍ നേരിട്ടു നടത്തുന്ന 3000ത്തിലധികം പ്രീ പ്രൈമറികളിലെ വിദ്യാര്‍ഥികള്‍ക്ക് സര്‍ക്കാര്‍ അംഗീകൃത സിലബസോ അധ്യാപകര്‍ക്ക് സാമ്പത്തിക സഹായമോ ബാധകമായിട്ടില്ല. ഇത്തരം പ്രീ പ്രൈമറികളെ കൂടി സര്‍ക്കാര്‍ നിയന്ത്രണത്തില്‍ കൊണ്ടുവന്ന് ഈ മേഖല ശക്തിപ്പെടുത്താനാണ് സര്‍ക്കാര്‍ ആലോചിക്കുന്നത്. ഇതിനു ഭീമമായ ഫണ്ടും കണ്ടെത്തേണ്ടി വരും.
സാമൂഹികനീതി വകുപ്പിനു കീഴില്‍ സംസ്ഥാനത്ത് 33,000 അങ്കണവാടികളാണ് പ്രവര്‍ത്തിക്കുന്നത്. ഈ അങ്കണവാടികള്‍ക്ക് ആവശ്യമുള്ള സാമ്പത്തിക സഹായം കേന്ദ്ര സര്‍ക്കാര്‍ അനുവദിക്കുന്നുണ്ട്. കേന്ദ്ര സര്‍ക്കാരിന്റെ സഹായം കൂടി പ്രയോജനപ്പെടുത്തി അങ്കണവാടികളും പ്രീ പ്രൈമറികളും തമ്മില്‍ ബന്ധിപ്പിക്കാന്‍ സാധിക്കുമോയെന്നാണ് സര്‍ക്കാര്‍ പരിശോധിക്കുന്നത്.