കോഴിക്കോട്: വിദ്യാര്‍ഥികളെ സംഘാടകര്‍ മര്‍ദ്ദിച്ചെന്നാരോപിച്ച് ഫാറൂഖ് കോളജ് വിദ്യാര്‍ഥി യൂനിയന്‍ കിരീടം ബഹിഷ്‌ക്കരിച്ചു.
ഇന്നലെ ഏറെ വൈകി നടന്ന സമ്മാന ദാന ചടങ്ങില്‍ നിന്നും വിദ്യാര്‍ഥികളും യൂനിയന്‍ പ്രതിനിധികളും വിട്ടുനിന്നെങ്കിലും സംഘാടകരോട് അനുഭാവം പുലര്‍ത്തുന്ന കോളജിലെ ഏതാനും വിദ്യാര്‍ഥികള്‍ ചേര്‍ന്ന് കിരീടം ഏറ്റുവാങ്ങി.
പെണ്‍കുട്ടികളുടെ ഗ്രൂപ്പ് വിഭാഗം നാടോടി മത്സരം പൂര്‍ത്തിയാകാത്തതിനാല്‍ ഇന്നലെ ഏറെ വൈകിയാണ് സമാപന സമ്മേളനം നടത്തിയത്.
കോഴിക്കോട് കോര്‍പ്പറേഷന്‍ മേയര്‍ തോട്ടത്തില്‍ രവീന്ദ്രന്‍ സമ്മേളനം ഉദ്ഘാടനം ചെയ്‌തെങ്കിലും ഈ വേദിയില്‍ വച്ച് വിജയികള്‍ക്കുള്ള സമ്മാനദാനം നടത്താനായില്ല. കലാപ്രതിഭ, തിലകം പട്ടം നേടിയവര്‍ക്കും മറ്റ് വിജയികള്‍ക്കും സമ്മാനം നല്‍കുമ്പോഴും നാടോടി നൃത്തം തൊട്ടരികിലെ വേദിയില്‍ നടക്കുകയായിരുന്നു. രാത്രി 11.30ഓടെയാണ് മത്സരങ്ങള്‍ മുഴുവനായും പൂര്‍ത്തിയായത്.