കൊച്ചി: വീട്ടമ്മയെ മയക്കിക്കിടത്തി 11 പവനോളം സ്വര്‍ണം കവര്‍ന്നെന്ന പരാതി കെട്ടിച്ചമച്ചതെന്നു പൊലിസ്. സംഭവത്തെ തുടര്‍ന്ന് പരാതിക്കാരിയായ വീട്ടമ്മയുടെ മൊഴി രണ്ടു വട്ടമെടുത്തെങ്കിലും  വ്യക്തത വരുന്നില്ലെന്നും പരാതി കെട്ടിച്ചമച്ചതാണെന്നും കടവന്ത്ര എസ്.ഐ എം.കെ സജീവ് പറഞ്ഞു.
വീട്ടമ്മയുടെ മൊഴി രണ്ടു വട്ടം എടുത്തപ്പോഴും വ്യത്യസ്ത മൊഴികളാണ് ലഭിച്ചത്.  അന്വേഷണത്തിന്റെ ഭാഗമായി മോഷണം നടന്ന വീട്ടില്‍ പരിശോധന നടത്തിയെങ്കിലും സംശയമുളവാക്കുന്ന യാതൊന്നും കണ്ടെത്താനായില്ലെന്നും പൊലിസ് പറഞ്ഞു. ഈ മാസം ആറിന്  എറണാകുളം കമ്മട്ടിപ്പാടം സ്വദേശിയായ വീട്ടമ്മയാണ് താന്‍ ആക്രമണത്തിനിരയായെന്നും അക്രമി വീട്ടില്‍ നിന്ന് 11 പവന്‍ സ്വര്‍ണം കവര്‍ന്നെന്നും പൊലിസില്‍ പരാതി നല്‍കിയത്.
സംഭവം നടക്കുമ്പോള്‍ വീട്ടില്‍ ആരുമുണ്ടായിരുന്നില്ലെന്നും പുറത്തുപോയിരുന്ന ഭര്‍ത്താവ് തിരിച്ചെത്തിയപ്പോഴാണ് താന്‍ ബോധരഹിതയായി  കിടക്കുന്നത്  കണ്ടതെന്നും പരാതിയില്‍ പറയുന്നു. വീട്ടമ്മയെ കടവന്ത്രയിലെ സ്വകാര്യ ആശുപത്രിയിലെത്തിച്ച ശേഷം പൊലിസിനെ വിവരമറിയിക്കുകയായിരുന്നു.