ഓടത്തോട്: കൂട്ടമുണ്ട കാപ്പിത്തോട്ടത്തിന് സമീപത്ത് താമസിക്കുന്ന ജനങ്ങള്‍ കാട്ടാന ഭീതിയില്‍. കഴിഞ്ഞ രണ്ട് ദിവസമായി രാത്രി കാട്ടാന തോട്ടത്തിലൂടെ ജനവാസ കേന്ദ്രത്തിലെത്തുകയാണ്. പരിസരത്തെ കമുകുകളും തെങ്ങുകളും നശിപ്പിച്ചു.
കാട്ടാന ജനവാസ കേന്ദ്രങ്ങളിലെത്തിയതോടെയാണ് ജനങ്ങള്‍ ഭീതിയിലായത്. തൊട്ടടുത്ത തോട്ടത്തിലേക്ക് ചെമ്പ്ര വനത്തില്‍ നിന്നാണ് ആനകള്‍ ഇറങ്ങുന്നത്. തോട്ടത്തിലെ ചക്കകള്‍ തേടിയെത്തുന്ന ആനകള്‍ അര്‍ധ രാത്രിയോടെ തൊഴിലാളികള്‍ തിങ്ങി താമസിക്കുന്ന പ്രദേശത്ത് എത്തുന്നത് ജനങ്ങളെ ആശങ്കയിലാക്കിയിട്ടുണ്ട്. ജനങ്ങളുടെ ജീവനും സ്വത്തിനും സംരക്ഷണം നല്‍കണമെന്ന് പ്രദേശത്തുകാര്‍ ആവശ്യപ്പെട്ടു.