കയ്പമംഗലം: കൂളിമുട്ടം എ.എം.യു.പി സ്‌കൂള്‍ വികസനത്തിന് തയാറെടുക്കുന്നു. നാളെ സ്‌കൂളങ്കണത്തില്‍ നടക്കുന്ന പൂര്‍വ വിദ്യാര്‍ഥി സംഗമത്തിലാണ് വിദ്യാലയ വികസന പ്രവര്‍ത്തനങ്ങള്‍ക്ക് തുടക്കം കുറിക്കുന്നത്. 1920ല്‍ ആരംഭിച്ച സ്‌കൂളിനെ പുരോഗതിയിലേക്ക് കൊണ്ടുവരാനുള്ള ശ്രമത്തിലാണ് നാട്ടുകാരും പൂര്‍വ വിദ്യാര്‍ഥികളും. ഇരുനൂറിലേറെ വിദ്യാര്‍ഥികളും പതിനാല് അധ്യാപകരും പ്രവര്‍ത്തിക്കുന്ന വിദ്യാലയത്തില്‍ അമ്പത് ലക്ഷം രൂപയുടെ നിര്‍മാണ പ്രവര്‍ത്തനങ്ങളാണ് ആരംഭിക്കാന്‍ പോകുന്നത്.
വിദ്യാലയ വികസന സമിതിയുടെ നേതൃത്വത്തില്‍ സ്മാര്‍ട്ട് ക്ലാസ് റൂമുകള്‍, വാട്ടര്‍ പ്യൂരിഫയര്‍, കളി ഉപകരണങ്ങള്‍, ലൈബ്രറി, ലാബുകള്‍ തുടങ്ങി നിരവധി കാര്യങ്ങള്‍ ഒരുക്കാന്‍ തീരുമാനിച്ചിട്ടുണ്ട്. നാളെ നടക്കുന്ന പൂര്‍വ വിദ്യാര്‍ഥി സംഗമം ഗ്രാമപഞ്ചായത്ത് പ്രസിഡന്റ് ഇ.ജി സുരേന്ദ്രന്‍ ഉദ്ഘാടനം ചെയ്യും. ടി.ബി സുരേഷ് ബാബു, ടി.എസ് സജീവന്‍, സി.ഐ നാസര്‍, എന്‍.യു ഷെര്‍ഫൂണ്‍ എന്നിവരാണ് വിദ്യാലയ വികസന പ്രവര്‍ത്തനങ്ങള്‍ക്ക് നേതൃത്വം നല്‍കുന്നത്.