കയ്പമംഗലം: മൂന്നുപീടികയില്‍ ഓട്ടോ ഡ്രൈവറെ സംഘം ചേര്‍ന്ന് മര്‍ദിച്ചതിനെ തുടര്‍ന്നുള്ള പ്രതിഷേധം ശക്തമാവുന്നു.
ചളിങ്ങാട് സ്വദേശി മുതിരപറമ്പില്‍ കബീറിനാണ് മര്‍ദനമേറ്റത്. കഴിഞ്ഞ ദിവസം രാത്രിയിലാണ് സംഭവം. ബൈക്കിന് സൈഡ് നല്‍കിയില്ലെന്നാരോപിച്ച് ബൈക്കിലെത്തിയ രണ്ടു പേര്‍ മൂന്നുപീടികയില്‍ വച്ച് കബീറിനെ മര്‍ദിക്കുകയും പിന്നീട് രണ്ടു പേര്‍ കൂടി ചേര്‍ന്ന് വീണ്ടും മര്‍ദിച്ചെന്നുമാണ് പരാതിയില്‍ പറയുന്നത്.
 പരാതിയെ തുടര്‍ന്ന് മതിലകം പൊലിസ് കേസെടുത്ത് അന്വേഷണം ആരംഭിച്ചു. അതേസമയം കബീറിനെ മര്‍ദിച്ചതില്‍ പ്രതിഷേധിച്ച് മൂന്നുപീടികയില്‍  ഓട്ടോ തൊഴിലാളികള്‍ പണിമുടക്കി. സംയുക്ത യൂനിയന്റെ നേതൃത്വത്തില്‍ പ്രകടനവും പൊതുയോഗവും നടത്തി. സി.ഐ.ടി.യു നാട്ടിക ഏരിയ ജോയിന്റ് സെക്രട്ടറി പി.സി മനോജ് ഉദ്ഘാടനം ചെയ്തു.
ബി.എം.എസ് യൂനിറ്റ് പ്രസിഡന്റ് കെ.രമേഷ് അധ്യക്ഷനായി. വിവിധ കക്ഷി നേതാക്കളായ കെ.എഫ് ഡൊമനിക്, പി.എസ് സിദ്ദീഖ്, പി.എ ഷെജീര്‍, പി.എസ് ഷാഹിര്‍, കെ.യു ബിജു, ജോസഫ് സംസാരിച്ചു.