മാഡ്രിഡ്: യൂറോപ്പിലെ ഫുട്‌ബോള്‍ രാജാക്കന്‍മാരെ ഇന്നറിയാം. ഇന്ന് രാത്രി മാഡ്രിഡില്‍ നടക്കുന്ന കലാശപ്പോരാട്ടത്തിന് ശേഷം ഈ വര്‍ഷത്തെ ചാംപ്യന്‍സ് ലീഗ് കിരീടം ഏറെ നാളത്തെ ഇടവേളക്ക് ശേഷം വീണ്ടും ഇംഗ്ലണ്ടിലേക്ക് വിരുന്നെത്തും. പ്രീമിയര്‍ ലീഗിലെ പോരാളികളായ ടോട്ടനവും ലിവര്‍പൂളും തമ്മിലാണ് കലാശപ്പോരാട്ടത്തിനു വേണ്ടി മാഡ്രിഡിലെത്തിയിട്ടുള്ളത്. സ്വപ്ന തുല്യമായ തിരിച്ചുവരവ് നടത്തിയായിരുന്നു ഇരു ടീമുകളും ഫൈനലിലേക്ക് യോഗ്യത നേടിയത്. സെമിയുടെ ആദ്യ പാദത്തില്‍ ബാഴ്‌സലോണയോട് മൂന്ന് ഗോളിന് പരാജയപ്പെട്ട് രണ്ടാം പാദത്തില്‍ നാല് ഗോള്‍ തിരിച്ചടിച്ചായിരുന്നു ലിവര്‍പൂള്‍ ഗംഭീര തിരിച്ചുവരവ് നടത്തിയത്.

രണ്ടാം സെമിയിലെ ആദ്യ പാദത്തില്‍ അയാക്‌സിനോട് ഒരു ഗോളിന് പരാജയപ്പെട്ട് രണ്ടാം പാദത്തില്‍ സ്വപ്ന തുല്യമായി തിരിച്ചുവരവ് നടത്തിയാണ് ടോട്ടനവും മാഡ്രിഡിലേക്കെത്തിയത്.

2008നുശേഷം ആദ്യമായാണ് ചാംപ്യന്‍സ് ലീഗില്‍ ഓള്‍ ഇംഗ്ലീഷ് ഫൈനല്‍ നടക്കുന്നത്. 2012ലാണ് ലിവര്‍പൂള്‍ അവസാനമായി ചാംപ്യന്‍മാരായതെങ്കില്‍, ടോട്ടനമാവട്ടെ ഇതുവരെ ചാംപ്യന്‍സ് ലീഗില്‍ ജേതാക്കളായിട്ടുമില്ല. ഇംഗ്ലീഷ് പ്രീമിയര്‍ ലീഗില്‍ തലനാരിഴയ്ക്ക് കിരീടം നഷ്ടമായ ലിവര്‍പൂളിനിത് അഭിമാനപ്പോരാട്ടമാണ്. ചാംപ്യന്‍സ് ലീഗ് കിരീടം ആന്‍ഫീല്‍ഡിലെ ഷെല്‍ഫിലെത്തിച്ച് സീസണിലെ ആദ്യം കിരീടം തേടിയാണ് ലിവര്‍പൂള്‍ ഇറങ്ങുന്നത്.

ക്ലോപ്പിന് കീഴില്‍ കഴിഞ്ഞ വര്‍ഷവും ചാംപ്യന്‍സ് ലീഗിന്റെ ഫൈനല്‍ വരെ ലിവര്‍പൂള്‍ എത്തിയിരുന്നു.
അതിനാല്‍ത്തന്നെ കിരീടത്തില്‍ കുറഞ്ഞതൊന്നും അവര്‍ പ്രതീക്ഷിക്കുന്നില്ല. മൗറീഷ്യോ പൊച്ചെറ്റിനോയുടെ കീഴില്‍ സ്പര്‍സും തികഞ്ഞ ആത്മവിശ്വാസത്തിലാണ്.
പരുക്കേറ്റ ടോട്ടനം നായകന്‍ ഹാരി കെയിന്‍ ഇന്നത്തെ മത്സരത്തില്‍ തിരിച്ചെത്തിയേക്കും. ലിവര്‍പൂള്‍ നിരയിലും എല്ലാ താരങ്ങളും ഇന്ന് കളത്തിലിറങ്ങും.