ന്യൂഡല്‍ഹി: നാവികസേന തലവനായി കരംഭീര്‍ സിങ് ചുമതലയേറ്റു. സേനയുടെ 24ാം തലവനായി ചുമതലയേറ്റ അദ്ദേഹം സേനയെ നയിക്കുന്ന ആദ്യത്തെ ഹെലികോപ്റ്റര്‍ പൈലറ്റാണ്.
അഡ്മിറല്‍ സുനില്‍ ലന്‍ബ സ്ഥാനം ഒഴിഞ്ഞതിനെ തുടര്‍ന്നാണ് കരംഭീര്‍ ചുമതലയേറ്റത്.ഇത് അഭിമാനകരമായ പദവിയാണെന്നും സേനയെ പുതിയ ഉന്നത തലങ്ങളിലേക്ക് എത്തിക്കാന്‍ ശ്രമിക്കുമെന്നും അദ്ദേഹം ചുമതലയേറ്റെടുത്തതിന് ശേഷം പറഞ്ഞു. മുന്‍ഗാമി സുനില്‍ ലന്‍ബ മഹത്തായ നേതൃത്വമാണ് സേനക്ക് നല്‍കിയതെന്നും അദ്ദേഹം കൂട്ടിച്ചേര്‍ത്തു. നാവികസേനക്ക് നിലവില്‍ 132 കപ്പലുകള്‍, 220 വിമാനവാഹിനിക്കപ്പലുകള്‍, 15 മുങ്ങിക്കപ്പലുകള്‍ എന്നിവയാണുള്ളത്. സീനിയോറിറ്റി പരിഗണക്കാതെ കരംഭീറിനെ നാവിക സേന തലവനാക്കുന്നതിനെതിരേ അന്തമാന്‍ നിക്കോബാര്‍ കമാന്‍ഡ് ഇന്‍ ചീഫ് ബിമല്‍വര്‍മ പരാതി നല്‍കിയിരുന്നു. എന്നാല്‍ പ്രതിരോധ മന്ത്രാലയം ഇദ്ദേഹത്തിന്റെ പരാതി തള്ളുകയായിരുന്നു.