10 യു.എസ് സൈനിക ഓഫിസര്‍മാരും നിരവധി സൈനികരും കൊല്ലപ്പെട്ടെന്ന് താലിബാന്‍

കാബൂള്‍: കാബൂളില്‍ യു.എസ് സൈനിക വാഹനവ്യൂഹത്തിനു നേരെ താലിബാന്‍ നടത്തിയ ചാവേറാക്രമണത്തില്‍ നാലു പേര്‍ കൊല്ലപ്പെട്ടു. കാറില്‍ വന്ന ചാവേറാണ് പൊട്ടിത്തെറിച്ചത്. കൊല്ലപ്പെട്ടവര്‍ അഫ്ഗാന്‍ പൗരന്മാരാണെന്ന് ഉദ്യോഗസ്ഥര്‍ പറഞ്ഞു.
പ്രാദേശിക സമയം രാവിലെ 8.40നായിരുന്നു സ്‌ഫോടനം. യു.എസ് സൈനിക വാഹനവ്യൂഹം കടന്നുപോകുന്നതിനിടെ സ്‌ഫോടകവസ്തു നിറച്ച വാഹനം അതിലേക്ക് ഇടിച്ചുകയറ്റുകയായിരുന്നു. സൈനിക വാഹനത്തിലുള്ളവര്‍ക്ക് നിസാരമായ പരുക്കേറ്റു. അതേസമയം 10 യു.എസ് സൈനിക ഓഫിസര്‍മാരും നിരവധി സൈനികരും കൊല്ലപ്പെട്ടതായി താലിബാന്‍ വക്താവ് സബീഹുല്ല മുജാഹിദ് പറഞ്ഞു. കഴിഞ്ഞദിവസം ഒരു ഐ.എസ് ചാവേര്‍ അഫ്ഗാന്‍ സൈനിക അക്കാദമിയുടെ പുറത്ത് പൊട്ടിത്തെറിച്ച് ആറുപേര്‍ കൊല്ലപ്പെട്ടിരുന്നു.