എടപ്പാള്‍: അപൂര്‍വങ്ങളായ വാദ്യകലകളുടെ സമന്വയത്തിനു വേദിയായ സോപാനം വാദ്യോത്സവം സമാപിച്ചു. സമാപന ദിവസമായ ഇന്നലെ അഞ്ച് മദ്ദളങ്ങള്‍ ഒരുമിച്ചും ഒറ്റയായും താളനിബദ്ധമായി വായിക്കുന്ന പഞ്ചമദ്ദളകേളി കലാമണ്ഡലം അനന്തകൃഷ്ണനും സംഘവും അവതരിപ്പിച്ചു. കൂടാതെ ഇടുക്കി ജില്ലയിലെ മലപ്പുലയര്‍ വിഭാഗക്കാരുടെ നൃത്തമായ മലപ്പുലയ ആട്ടം മറയൂര്‍ ജഗദീഷും സംഘവും അവതരിപ്പിച്ചു. ഈ നൃത്തത്തില്‍ കിടിമുട്ടി, ഉറുമി തുടങ്ങിയ വാദ്യോപകരണങ്ങളാണ് ഉപയോഗിച്ചത്.
പത്തനംതിട്ട, ആലപ്പുഴ ജില്ലകളില്‍ അവതരിപ്പിക്കുന്ന കലാരൂപം പടയണിയുടെ അകമ്പടിയായി ഉപയോഗിക്കുന്ന തപ്പ് മേളം ഗോത്രകലാപീഠം കുന്നന്താനം അവതരിപ്പിച്ചു. മലപ്പുറം, പാലക്കാട്, തൃശൂര്‍ ജില്ലകളില്‍ പ്രചാരത്തിലുണ്ടണ്ടായിരുന്ന വില്ലു പാട്ട്, വില്ലടിച്ചാന്‍ പാട്ട് എന്നീ കലാരൂപങ്ങള്‍ക്ക് ഉപയോഗിക്കുന്ന വില്ല് ഉപയോഗിച്ചുകൊണ്ടണ്ടുള്ള വില്ലിന്‍മേല്‍ തായമ്പക കലാമണ്ഡലം രാജനും സംഘവും അവതരിപ്പിച്ചപ്പോള്‍  മാപ്പിള കലാ അക്കാദമി എടപ്പാള്‍ ചാപ്റ്ററിന്റെ നേതൃത്വത്തില്‍ മാപ്പിള പാരമ്പര്യത്തില്‍ അതിഷ്ഠിതമായ കോല്‍ക്കളി അവതരിപ്പിച്ചു.
എടപ്പാള്‍ വാസു പുള്ളവനും സംഘവും പുള്ളുവന്‍പാട്ടും ജെയ്‌സനും സംഘവും ചേര്‍ന്ന് ഫ്യൂഷന്‍ സംഗീതവും അവതരിപ്പിച്ചു. അന്യം നിന്നുകൊണ്ടണ്ടിരിക്കുന്ന മുപ്പത്തിയഞ്ചോളം വാദ്യകലകളാണ് കഴിഞ്ഞ ആറ് ദിവസമായി പെരുമ്പറമ്പില്‍ അരങ്ങേറിയത്. മണ്‍മറഞ്ഞു പോയതും അവഗണിക്കപ്പെട്ട് കിടക്കുന്നതുമായ കലാരൂപങ്ങളെ രംഗത്തെത്തിച്ചതിന് പുറമേ പുരാതന വാദ്യോപകരണങ്ങളുടെയും അവയുമായി ബന്ധപ്പെട്ട കലാരൂപങ്ങളുടെ ചമയപ്രദര്‍ശനവും വാദ്യകലാകാരന്‍മാരുടെ ചിത്ര പ്രദര്‍ശനവും നടന്നു. ഈ രംഗത്ത് പഠനം നടത്തുന്നവര്‍ക്കും സാധാരണക്കാര്‍ക്കും ആസ്വാദകരമാകുന്ന വിധമാണ് കലാവിരുന്ന് ആസൂത്രണം ചെയ്തിരുന്നത്.