കഴക്കൂട്ടം: കാര്യവട്ടം എല്‍.എന്‍.സി.പി കോളജില്‍ നടന്ന കേരള സര്‍വ്വകലാശാല ഇന്റര്‍ കോളജ് അക്വാറ്റിക് മത്സരത്തില്‍ ചെമ്പഴന്തി എസ്.എന്‍ കോളജിന് ഓവര്‍ഓള്‍ ചാംപ്യന്‍ഷിപ്പ്.
പുരുഷ വിഭാഗത്തില്‍ 89 പോയിന്റും വനിതാ വിഭാഗത്തില്‍ 135 പോയിന്റും നേടിയാണ് ചെമ്പഴന്തി എസ്.എന്‍ ചാംപ്യന്‍മാരായത്. പുരുഷവിഭാഗത്തില്‍ ചാംപ്യന്‍ഷിപ്പിലെ നാല് മീറ്റ് റിക്കാര്‍ഡുകള്‍ നേടിയ ചെമ്പഴന്തി കോളജിലെ എം. വാസുറാം മേളയിലെ താരമായി.
100 മീറ്റര്‍ ഫ്രീ സ്റ്റെല്‍ (സമയം 55.39 സെക്കന്റ്), 200 മീറ്റര്‍ ഫ്രീ സ്റ്റെല്‍ ( 2;03.26), 50 മീറ്റര്‍ ബട്ടര്‍ ഫ്‌ളൈ (26.28 സെക്കന്റ്), 100 മീറ്റര്‍ ബട്ടര്‍ഫ്‌ളൈ (1:00.25) എന്നീ വിഭാഗങ്ങളിലാണ് ചാംപ്യന്‍ഷിപ്പിലെ റിക്കാര്‍ഡ് കരസ്ഥമാക്കിയത്. ചെമ്പഴന്തി എസ്.എന്‍ കോളജിലെ അക്ഷയ് ആര്‍.ജെയും 400 മീറ്റര്‍ ഇന്‍ഡിവിജുവല്‍ മെഡ്‌ലെയില്‍ റെക്കോഡ് തിരുത്തി (5:10.60 സെക്കന്റ്).
കേരള യൂനിവേഴ്‌സിറ്റി റഷ്യന്‍ഡിപ്പാര്‍ട്ട്‌മെന്റിലെ സുനീഷ് .എസ് മൂന്ന് റിക്കാര്‍ഡുകള്‍ കരസ്ഥമാക്കി. 50 മീറ്റര്‍ ബ്രസ്റ്റ് സ്‌ട്രോക്ക്, 100 മീറ്റര്‍ ബ്രസ്റ്റ് ട്രോക്ക്, 200 മീറ്റര്‍ ബ്രസ്റ്റ് സ്‌ട്രോക്ക് എന്നീ ഇനങ്ങളിലാണ് റിക്കാര്‍ഡ് നേടിയത്.
വിജയികള്‍ക്ക് കേരള സര്‍വ്വകലാശാല കായിക വിഭാഗം ഡയറക്ടര്‍ ഡോ. ജയരാജന്‍ ഡേവിഡ് സമ്മാനങ്ങള്‍ വിതരണം ചെയ്തു. മുന്‍ സെനറ്റ് മെംബര്‍ ഡോ. വി.കെ മധു, ഡോ. ജോര്‍ജ് തോമസ് പങ്കെടുത്തു.