തിരുവനന്തപുരം: കന്യാസ്ത്രീയെ പീഡിപ്പിച്ച കേസില്‍ സര്‍ക്കാര്‍ കുറ്റവാളിയെ രക്ഷപ്പെടുത്തുന്ന സമീപനം സ്വീകരിക്കുന്നതായി കെ.പി.സി.സി ഉപാധ്യക്ഷന്‍ വി.ഡി സതീശന്‍ എം.എല്‍.എ. 76 ദിവസം കഴിഞ്ഞിട്ടും കുറ്റാരോപിതനെ ചോദ്യം ചെയ്യാന്‍ പൊലിസിനു കഴിയാത്തത് എന്തുകൊണ്ടാണെന്നും അദ്ദേഹം ചോദിച്ചു.
സ്വാധീനമുള്ളവര്‍ക്കു നിയമത്തെ സ്വാധീനിക്കാമെന്ന സന്ദേശമാണ് സര്‍ക്കാര്‍ നല്‍കുന്നത്. നിയമം കുറ്റാരോപിതന്റെ പിന്നാലെ പോകുന്ന അവസ്ഥയാണ്. വിന്‍സന്റ് എം.എല്‍.എക്കു ലഭിക്കാത്ത എന്തു നീതിയാണ് ബിഷപ്പ് ഫ്രാങ്കോയ്ക്കുള്ളത്.
കുറ്റാരോപിതനെ ചോദ്യം ചെയ്യാന്‍ രാഷ്ട്രീയ തീരുമാനം വന്നില്ലെന്നാണ് പൊലിസ് പറയുന്നത്. ബലാത്സംഗക്കേസില്‍ എന്തു രാഷ്ട്രീയ തീരുമാനമാണു വരേണ്ടതെന്നും വി.ഡി സതീശന്‍ ചോദിച്ചു. ഹര്‍ത്താലുകള്‍ വ്യക്തിപരമായ സ്വാതന്ത്ര്യത്തിന്‍മേലുള്ള സംഘടിത കടന്നുകയറ്റമാണെന്നും പരിഷ്‌കൃത സമൂഹത്തിനു യോജിച്ചതല്ലെന്നും അദ്ദേഹം പറഞ്ഞു.