സ്വന്തം ലേഖിക
കൊച്ചി: കളമശ്ശേരി മെഡിക്കല്‍ കോളജ് ആശുപത്രിയിലെ തീവ്രപരിചരണ വിഭാഗത്തില്‍ രോഗിക്കുണ്ടായ ദുരനുഭവം തുറന്നുപറഞ്ഞ് മറ്റൊരു പരാതി കൂടി. പെരുമ്പാവൂര്‍ സ്വദേശി അബ്ദുല്‍ ഖാദറിനുണ്ടായ ദുരനുഭവം വിവരിച്ച് മക്കളായ അനീഷും അജ്മലുമാണ് രംഗത്തെത്തിയത്. തീവ്രപരിചരണ വിഭാഗത്തില്‍ ഒരാഴ്ചയിലേറെ കഴിയേണ്ടിവന്ന തങ്ങളുടെ പിതാവ് ജീവനക്കാരുടെ അനാസ്ഥ കാരണം നരകയാതന അനുഭവിക്കേണ്ടിവന്നു എന്നാണ് ഇവരുടെ പരാതി.
കൊവിഡ് പൊസിറ്റീവായതിനു പിന്നാലെ ചുമയും ശ്വാസംമുട്ടലുമുണ്ടായതിനാല്‍ കഴിഞ്ഞ 11നാണ് അബ്ദുല്‍ ഖാദറിനെ കളമശ്ശേരി മെഡിക്കല്‍ കോളജില്‍ പ്രവേശിപ്പിച്ചത്. കൊവിഡ് സാഹചര്യം കാരണം പിതാവിനെ കാണാന്‍ കഴിഞ്ഞിരുന്നില്ല. ഒരു വിവരവും അറിഞ്ഞിരുന്നുമില്ല. ഒടുവില്‍ ചില രാഷ്ട്രിയക്കാരുടെ ഇടപെടലോടെയാണ് പി.പി.ഇ കിറ്റ് ധരിച്ച് പിതാവിനെ കാണാന്‍ അനുമതി ലഭിച്ചത്. അപ്പോഴാണ് കഴിഞ്ഞ ഒരാഴ്ച നരകയാതന അനുഭവിക്കുകയായിരുന്നെന്ന് പിതാവ് പറഞ്ഞത്.
മരുന്ന് കുത്തിവയ്ക്കാന്‍ ഇട്ട കാനുലയുടെ അടപ്പ് അടയ്ക്കാതിരുന്നതിനാല്‍ രക്തം ചീറ്റിത്തെറിച്ച് വയറിലും കൈയിലും സമീപത്തെ ഫോണിലുമെല്ലാം കട്ടപിടിച്ചുകിടക്കുകയായിരുന്നു. തുടര്‍ന്ന് മൊബൈല്‍ ഫോണ്‍ കേടാവുകയുമുണ്ടായി. പിതാവിന്റെ അവസ്ഥ കണ്ട് വന്‍തുക കടംവാങ്ങി സ്വകാര്യ ആശുപത്രിയിലേക്ക് മാറ്റിയിരിക്കുകയാണെന്നും അവര്‍ പറഞ്ഞു.