തിരുവനന്തപുരം: കണ്ണൂരില്‍ വീണ്ടും രാഷ്ട്രീയ കൊലപാതകമുണ്ടായത് അപലപനീയമെന്ന് പ്രതിപക്ഷ നേതാവ് രമേശ് ചെന്നിത്തല. സി.പി.എമ്മും ആര്‍.എസ്.എസും ആയുധം താഴെവയ്ക്കണം.
കണ്ണൂരിലെ സമാധാനശ്രമങ്ങള്‍ ആത്മാര്‍ഥതയോടെയുള്ളതല്ല. പുറത്ത് സമാധാനം പ്രസംഗിക്കുകയും ഉള്ളില്‍ ആയുധത്തിന് മൂര്‍ച്ച കൂട്ടുകയുമാണ് ഇരുകക്ഷികളും ചെയ്യുന്നത്. ഒരുവര്‍ഷത്തിനിടയില്‍ കണ്ണൂരില്‍ എട്ടു രാഷ്ട്രീയ കൊലപാതകങ്ങളാണുണ്ടായത്. സംസ്ഥാനവും കേന്ദ്രവും ഭരിക്കുന്ന കക്ഷികളുടെ ആഭിമുഖ്യത്തിലാണ് അരുംകൊലകള്‍ നടക്കുന്നതെന്നത് ദൗര്‍ഭാഗ്യകരമാണ്. സമാധാനം നിലനിര്‍ത്താന്‍ ബാധ്യതയുള്ള ഇരുപാര്‍ട്ടികളും ചേര്‍ന്ന് കേരളത്തില്‍ ക്രമസമാധാനനില തകര്‍ക്കുകയാണ്. കൊലപാതകങ്ങള്‍ അവസാനിപ്പിക്കാനുള്ള ആത്മാര്‍ഥമായ ശ്രമം ആരംഭിക്കണമെന്നും ചെന്നിത്തല ആവശ്യപ്പെട്ടു.