ന്യൂഡല്‍ഹി: മുത്വലാഖ് നിരോധിക്കാനുള്ള ബില്‍ പാര്‍ലമെന്റില്‍ വീണ്ടും കൊണ്ടുവരുമെന്ന് നിയമമന്ത്രി രവിശങ്കര്‍ പ്രസാദ്. മുത്വലാഖ് നിരോധിക്കുമെന്ന് ബി.ജെ.പിയുടെ പ്രകടനപത്രികയിലുള്ള കാര്യമാണ് ഇതിനായുള്ള ബില്‍ തീര്‍ച്ചയായും കൊണ്ടുവരുമെന്ന് അദ്ദേഹം മാധ്യമങ്ങളോട് പറഞ്ഞു.
മുത്വലാഖ് നിരോധിക്കാനുള്ള ബില്‍ ലോക്‌സഭയില്‍ പാസാക്കിയിരുന്നെങ്കിലും ആവശ്യമായ പിന്തുണയില്ലാതെ തള്ളിപ്പോവുകയായിരുന്നു. ഏക സിവില്‍കോഡ് വിഷയത്തില്‍ നിയമ കമ്മിഷന്റെ റിപ്പോര്‍ട്ടിന്റെ അടിസ്ഥാനത്തില്‍ മാത്രമായിരിക്കും രാഷ്ട്രീയ തീരുമാനുമുണ്ടാവുകയെന്നും രവിശങ്കര്‍ പ്രസാദ് പറഞ്ഞു.
നിലവിലെ സാഹചര്യത്തില്‍ ഏക സിവില്‍കോഡ് ആവശ്യമില്ലെന്ന് നിയമ കമ്മിഷന്‍ കഴിഞ്ഞ ഓഗസ്റ്റില്‍ ഉപദേശം നല്‍കിയിരുന്നു. മുത്വലാഖ് കുറ്റകൃത്യമാക്കിക്കൊണ്ടുള്ള ബില്ലാണ് കഴിഞ്ഞ എന്‍.ഡി.എ സര്‍ക്കാര്‍ പാര്‍ലമെന്റില്‍ കൊണ്ടുവന്നത്. വിവാഹമോചനം നടത്തിയാല്‍ ഭര്‍ത്താവിന് മൂന്ന് വര്‍ഷം ജയില്‍ശിക്ഷ നല്‍കാന്‍ ബില്ലില്‍ ആവശ്യപ്പെട്ടിരുന്നു. മുത്വലാഖ് ബില്‍ ഓര്‍ഡിനന്‍സായി 2018 സെപ്റ്റംബറില്‍ കേന്ദ്രം പുറത്തിറക്കിയിരുന്നു. ഡിസംബറില്‍ ഇത് ലോക്‌സഭ പാസാക്കിയെങ്കിലും രാജ്യസഭയില്‍ പിന്തുണയില്ലാത്തതിനാല്‍ തള്ളിപ്പോവുകയായിരുന്നു.