പള്ളുരുത്തി: തെരുവ്‌നായയുടെ ആക്രമണത്തില്‍ യുവാവിന് ഗുരുതര പരുക്ക്. പള്ളുരുത്തി പുന്നക്കാട്ടുശേരി ജിതിന്‍ (29) ആണ് തെരുവ് നായ്ക്കളുടെ ആക്രമണത്തില്‍ കാലിന് ഗുരുതര പരിക്കേറ്റത്.
ബുധനാഴ്ച്ച രാവിലെ ഏഴ് മണിയോടെ പുല്ലാര്‍ദേശം റോഡിലാണ് സംഭവം. റോഡിലൂടെ നടന്നുപോകുകയായിരുന്ന ജിതിന്റെ നേരെ നായ്ക്കുട്ടം ഓടിയടുത്ത് അക്രമിക്കുകയായിരുന്നു. നായ്ക്കളുടെ കടിയേറ്റ ജിതിന്റെ കാലിന് അഞ്ച് ഇഞ്ച് നീളത്തില്‍ ആഴത്തില്‍ മുറിവേറ്റിട്ടുണ്ട്. കാല്‍പാദത്തിനും മുറിവുണ്ട്.
ആക്രമിച്ച നായ്ക്കളെ ഓടിച്ചു വിടാന്‍ ഇയാള്‍ ശ്രമം നടത്തിയെങ്കിലും വിടാതെ വീണ്ടും ഓടി അടുക്കുകയായിരുന്നു. പിന്നിട് കൈയില്‍ ഉണ്ടായിരുന്ന ബാഗ് നായ്ക്കളുടെ നേരെ വീശിയാണ് ഇയാള്‍ വീടിലേക്ക് ഓടിക്കയറി രക്ഷപ്പെട്ടത്. കാലിന് ഗുരുതരമായി പരിക്കേറ്റ ജിതിന്‍ എറണാകുളം സര്‍ക്കാര്‍ ആശുപത്രിയില്‍ ചികിത്സ തേടി. പള്ളുരുത്തിയില്‍ തെരുവ് നായ്ക്കളുടെ ശല്യം രൂക്ഷമാവുകയാണ്.
പ്രധാന ജംഗ്ഷനുകളിലെല്ലാം ഇവ കൂട്ടത്തോടെയാണ് തമ്പടിക്കുന്നത്. വാഹനത്തില്‍ പോകുന്നവരേയും കാല്‍നടയാത്രികരേയും ആക്രമിക്കുന്നത് നിത്യസംഭവമാണ്.