തൊടുപുഴ: കെ.പി.സി.സി.  അംഗങ്ങള്‍, ഡി.സി.സി ഭാരവാഹികള്‍, മുന്‍ ഡി.സി.സി. ഭാരവാഹികള്‍, ബ്ലോക്ക് പ്രസിഡന്റുമാര്‍, പോഷകസംഘടന ജില്ലാ പ്രസിഡന്റുമാര്‍, സംസ്ഥാന ഭാരവാഹികള്‍ എന്നിവര്‍ പങ്കെടുക്കുന്ന ഡി.സി.സി. നേതൃയോഗം ഇന്ന്  രാവിലെ  11 മണിയ്ക്ക് തൊടുപുഴ രാജീവ് ഭവനില്‍ ചേരുന്നതാണെന്ന് ഡി.സി.സി. പ്രസിഡന്റ് ഇബ്രാഹിംകുട്ടി കല്ലാര്‍ അറിയിച്ചു. യോഗത്തില്‍ സംസ്ഥാന റിട്ടേണിങ് ഓഫീസര്‍ സുദര്‍ശന്‍ നാച്ചിയപ്പന്‍, കെ.പി.സി.സി. നേതാക്കള്‍ തുടങ്ങിയവര്‍  പങ്കെടുക്കും.
ജില്ലയിലെ മുഴുവന്‍ ബൂത്തുകളിലും മെമ്പര്‍ഷിപ്പ് വിതരണം ചെയ്തുകൊണ്ട് അംഗത്വം വര്‍ധിപ്പിക്കുന്നതിനും ഡി.സി.സി. ഒരുക്കങ്ങള്‍ ആരംഭിച്ചു. ഇതിന്റെ ഭാഗമായി ഓരോ ബൂത്തിലെയും പ്രധാനപ്പെട്ട നേതാക്കള്‍ പ്രവര്‍ത്തകരോടൊപ്പം ഒരു ദിവസം നിര്‍ബന്ധമായും ഭവനസന്ദര്‍ശനം നടത്തി മെമ്പര്‍ഷിപ്പ് വിതരണം കാര്യക്ഷമമാക്കണമെന്നും നിര്‍ദ്ദേശിച്ചിട്ടുണ്ട്.
പരമാവധി അംഗങ്ങളെ ചേര്‍ത്ത് മെമ്പര്‍ഷിപ്പ് ബുക്കുകളോടൊപ്പം നിര്‍ദ്ദിഷ്ട ഫോറത്തില്‍ വിശദവിവരങ്ങള്‍ രേഖപ്പെടുത്തി അഞ്ചു കോപ്പിയും അഞ്ചു രൂപ മെമ്പര്‍ഷിപ്പു ഫീസും കൂടി അടയ്‌ക്കേണ്ടതാണെന്ന് ഡി.സി.സി. പ്രസിഡന്റ് അറിയിച്ചു.