കോഴിക്കോട്: മഹാനവമി ദിനത്തില്‍ പൂജയും ആരാധനയും ആഘോഷവുമായി പൊലീസും കെ.എസ്.ആര്‍.ടി.സിയും. തിരുവനന്തപുരം സിറ്റി പൊലീസ് കമ്മീഷണര്‍ ബല്‍റാംകുമാര്‍ ഉപധ്യായ ഐ.പി.എസാണ് ഒഫീസില്‍ പൂജ ദീപം തെളിയിച്ചു മഹാനവമി ആഘോഷിച്ചത്. സമാനമായ രീതിയില്‍ കണ്ണൂര്‍ ഡിപ്പോയിലും കെ.എസ്.ആര്‍.ടി.സി വാഹനങ്ങളില്‍ പൂജ കര്‍മങ്ങള്‍ നടത്തിയിരിക്കുകയാണ്. ഡിപ്പോയും ബസും അലങ്കരിക്കുകയും പൂജാ കര്‍മങ്ങള്‍ നടത്തുകയും ചെയ്തു.  ഉപകരണങ്ങളും ആയുധങ്ങളും പൂജയ്ക്ക് വെക്കുന്നത് ഹിന്ദു വിശ്വാസികളുടെ ആചാരണമാണ്. രാജ്യത്ത് എല്ലാ വിശ്വാസികളും ഇത് വിപുലമായി ആചരിക്കാറുണ്ട്. പല സംസ്ഥാനത്തും പല പേരിലാണ് ആഘോഷം. ദേവിയുടെ പ്രീതിക്കായും ദീര്‍ഘകാലത്തെ ഐശ്വര്യത്തിനായുമാണ് ഹിന്ദു വിശ്വാസികള്‍ ഈ പൂജ നിര്‍വഹിക്കുന്നത്. 

 

എന്നാല്‍ സര്‍ക്കാര്‍ സംവിധാനങ്ങളും ഓഫീസും ഇതിനായി ഉപയോഗിച്ചത് വലിയ വിമര്‍ശനത്തിനു ഇടയായിട്ടുണ്ട്. എല്ലാ മതവിശ്വാസികളുടേയും മതങ്ങളില്‍ വിശ്വാസമില്ലാത്തവരുടേയും നികുതി പണം ഉപയോഗിച്ചു വാങ്ങുന്ന പൊതുമുതലുപയോഗിച്ച് ഒരു മത വിശ്വാസികളുടെ മാത്രം ആഘോഷം നടത്തുന്നത് ശരിയല്ലെന്ന വിമര്‍ശനമാണ് പ്രധാനമായും ഉയരുന്നത്.