അയല്‍വാസികള്‍ കുടുംബത്തെ ആക്രമിക്കുന്നെന്നും നടപടിയുണ്ട@ാകുന്നില്ലെന്നുമാണ് പരാതി
മലപ്പുറം: നീതിലഭിക്കുന്നില്ലെന്നാരോപിച്ച് യുവാവും കുടുംബവും ആത്മഹത്യഭീഷണിയുമായി ജില്ലാ പൊലിസ് മേധാവിയുടെ ഓഫിസിനുമുന്നിലെത്തി.
കോട്ടക്കല്‍ ഇന്ത്യനൂര്‍ കോല്‍ക്കളം സ്വദേശി വില്ലന്‍ വീട്ടില്‍ അസ്‌കറലിയും കുടുംബവുമാണ് ഇന്നലെ കന്നാസില്‍ സൂക്ഷിച്ച അഞ്ച് ലിറ്റര്‍ മണ്ണെണ്ണയുമായി പൊലിസ് മേധാവിയെ കാണാനെത്തിയത്. അയല്‍വാസികള്‍ തന്നെയും കുടുംബത്തെയും ആക്രമിക്കുകയാണെന്നും കള്ളക്കേസില്‍ കുടുക്കുകയാണെന്നും ഇയാള്‍ എസ്.പിക്കുമുന്നില്‍ പരാതി പറഞ്ഞു.
അയല്‍വാസിയുടെ വീട്ടിലേക്ക് വഴിയില്ലാത്തതിനാല്‍ കുടുംബത്തിന്റെ മൂന്നര സെന്റ് ഭൂമിയില്‍ അനധികൃതമായി വഴിവെട്ടിയെന്നും ഇതിന് പണം നല്‍കാമെന്ന് അറിയിച്ചിരുന്നെങ്കിലും തന്നില്ലെന്നും അസ്‌കറലി ആരോപിച്ചു.
കുടുംബത്തിനെതിരേ അയല്‍വാസി കോട്ടക്കല്‍ പൊലിസില്‍ കള്ളക്കേസ് നല്‍കിയെന്നും പരാതിയില്‍ ആരോപണമുണ്ട്.
മാതാവ് ഖദീജ, മാതൃസഹോദരി സൈനബ, ഭാര്യ മുഹ്‌സിന എന്നിവര്‍ക്കൊപ്പമാണ് അസ്‌കറലി ജില്ലാ പൊലിസ് മേധാവിയുടെ ഓഫിസിലെത്തിയത്.
പരാതിയില്‍ നടപടിയെടുക്കാമെന്ന എസ്.പിയുടെ ഉറപ്പിനെ തുടര്‍ന്നാണ് ഇവര്‍ മടങ്ങിയത്.