പെരിന്തല്‍മണ്ണ: പ്രളയ ബാധിതര്‍ക്ക് കൈത്താങ്ങാവാന്‍ പെരിന്തല്‍മണ്ണയില്‍ ഒരുപറ്റം കലാകാരന്മാര്‍ ഒത്തൊരുമിച്ചത് തത്സമയ ചിത്രരചനയിലൂടെ.
പെരിന്തല്‍മണ്ണയിലെ ആര്‍ട്‌സ് സോണ്‍ ആര്‍ട് ആന്‍ഡ് ഫ്രെയിമിലെ കലാകാരന്മാരാണ് മുഖ്യമന്ത്രിയുടെ ദുരിതാശ്വാസ നിധിയിലേക്ക് തുക കണ്ടെത്താന്‍ തത്സമയ ചിത്ര രചനയിലൂടെ രംഗത്തെത്തിയത്. 'വര്‍ണങ്ങള്‍കൊണ്ടൊരു കൈത്താങ്ങ്' എന്ന പേരിലാണ് നഗരത്തില്‍ പരിപാടി സംഘടിപ്പിച്ചത്.
തങ്ങളുടെ സൃഷ്ടികള്‍ ആവശ്യക്കാര്‍ക്ക് അവരാല്‍കഴിയുന്ന തുകക്ക് കൈമാറുകയും ഇത്തരത്തില്‍ സമാഹരിക്കുന്ന പണം ദുരിത്വാശ്വാസ നിധിയിലേക്കായി മാറ്റിവെയ്ക്കുകയുമായിരുന്നു.
പരിപാടിക്ക് കലാകാരന്മാരായ ശ്രീനി കാവില്‍ മേലാറ്റൂര്‍, മഹേഷ് നാരായണന്‍ കൊപ്പം, കൊളത്തൂര്‍ പാങ്ങ് സ്വദേശികളായ വിഷ്ണു പിയന്‍, സുബീഷ് കൃഷ്ണ നേതൃത്വം നല്‍കി.