അമ്പലപ്പുഴ: നിരവധി ക്രിമിനല്‍ കേസില്‍ പ്രതിയായ അപ്പാപ്പന്‍ പത്രോസ് അറസ്റ്റില്‍. പുന്നപ്ര വടക്ക് പഞ്ചായത്ത് പറവൂര്‍ ഗലീലിയ തൈപറമ്പ് വീട്ടീല്‍ അപ്പാപ്പന്‍ പത്രോസ് എന്ന് വിളിക്കുന്ന പത്രോസ് ജോണി (25) നെയാണ് പുന്നപ്ര എസ്.ഐ ശ്രീജിത്തിന്റെ നേതൃത്വത്തിലുള്ള പൊലിസ് സംഘം അറസ്റ്റ് ചെയ്തത്.
പുന്നപ്ര സ്‌റ്റേഷനിലെ എസ്.ഐമാരായിരുന്ന കെ.റ്റി സന്ദീപ്, പി.പ്രസാസ് എന്നിവരെ ആക്രമിച്ച കേസ്  ഉള്‍പ്പടെ നിരവധി ക്രിമിനല്‍ കേസില്‍ പ്രതിയാണ് ഇയാള്‍. രണ്ടുവര്‍ഷം മുമ്പ് കാപ്പ ആക്റ്റ് പ്രകാരം പൂജപ്പൂര സെന്‍ട്രര്‍ ജയിലില്‍ ആറു മാസം തടവ് ശിക്ഷ അനുഭവിച്ച് പുറത്തുവരുകയും വീണ്ടും കുറ്റകൃത്യങ്ങളില്‍ ഏര്‍പ്പെടുകയുമായിരുന്നു. കഴിഞ്ഞ രണ്ടിന് ആലപ്പുഴ മുല്ലാത്ത് വളപ്പ് സ്വദേശിയും പറവൂര്‍ ഭാഗത്ത് അറവ്ശാല നടത്തിപ്പുകാരനുമായ നജീബിനെ അറവ്ശാലയില്‍ കയറി വെട്ടിയും കുത്തിയും ഇരുമ്പ് വടിയ്ക്ക് തലയ്ക്കടിച്ച് മാരകമുറിവേല്‍പ്പിച്ച ശേഷം ഇയാള്‍ ഒളിവില്‍ കഴിയുകയായിരുന്നു, രാത്രികാലങ്ങളില്‍ ബൈക്കില്‍ സഞ്ചരിക്കുന്ന യാത്രക്കാരെ ആക്രമിച്ച് പണം കവരുകയും ചെയ്ത കേസിലും  പ്രതിയാണ്.
ഇയാള്‍ക്കെതിരെ പുന്നപ്രസ് റ്റേഷനില്‍ മാത്രം ഒന്‍പതോളം ക്രിമിനല്‍ കേസാണുള്ളത്. തീരദേശ മേഘലയില്‍ മദ്യ-മയക്ക്മരുന്ന് മാഫിയയിലെ മുഖ്യ കണ്ണിയുമായ ഇയാള്‍ക്കവേണ്ടി  പോലീസ് തെരച്ചില്‍ ഊര്‍ജിതമാക്കിയിരുന്നു. ഇതേതുടര്‍ന്നണ് ആലപ്പുഴ ഭാഗത്ത് നിന്നും കഴിഞ്ഞ ദിവസം അര്‍ദ്ധരാത്രിയോടെ അറസ്റ്റിലാവുന്നത്. ജില്ലയിലെ പല സ്റ്റേഷനുകളിലും ഇയാള്‍ക്കെതിരെ കേസുള്ളതായി  പൊലിസ് അറിയിച്ചു. അമ്പലപ്പുഴ മജിസ്‌ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്റ് ചെയ്തു. സീനിയര്‍ സിവില്‍ പൊലിസ് ഓഫീസര്‍മാരായ അഗസ്റ്റിന്‍, സിദ്ധീക്ക്, പ്രതീപ് ദേവസ്യ, എന്നിവരും പൊലിസ് സംഘത്തിലുണ്ടായിരുന്നു.