പാരിസ്: ഫ്രഞ്ച് ഓപ്പണില്‍ ടോപ് സീഡ് നൊവാക് ദ്യോകോവിച്ചും ജപ്പാന്റെ കെയ് നിഷികോരിയും വിജയക്കുതിപ്പ് തുടരുന്നു. ലോക ഒന്നാം നമ്പര്‍ താരമായ ദ്യോകോവിച്ച് ജര്‍മനിയുടെ യാന്‍ ലെന്നാര്‍ഡ് സ്ട്രഫിനെ 6-3, 6-2, 6-2ന് പരാജയപ്പെടുത്തി ക്വാര്‍ട്ടറില്‍ കടന്നു. ഇതോടെ ഫ്രഞ്ച് ഓപ്പണില്‍ തുടര്‍ച്ചയായി 10 തവണ ക്വാര്‍ട്ടറില്‍ കടന്ന ആദ്യ താരമെന്ന റെക്കോര്‍ഡ് ദ്യോകോവിച്ച് സ്വന്തമാക്കി.
ആവേശം അവസാന സെറ്റ് വരെ നീണ്ടുനിന്ന മത്സരത്തിനൊടുവില്‍ ഫ്രഞ്ച് താരം ബെനോയറ്റ് പെയറിനെ പരാജയപ്പെടുത്തിയാണ് നിഷികോരി ക്വാര്‍ട്ടറിലെത്തിയത് (6-2, 6-7, 6-2, 6-7, 7-5). മികച്ച പ്രകടനമായിരുന്നു ഇരുവരും കാഴ്ചവച്ചത്. നിര്‍ണായകമായ അവസാന സെറ്റില്‍ 1-4ന് പിറകില്‍ പോയ ശേഷം തകര്‍പ്പന്‍ തിരിച്ചുവരവോടെയാണ് നിഷികോരി വിജയം നേടിയെടുത്തത്. മറ്റൊരു മത്സരത്തില്‍ ആസ്ട്രിയന്‍ താരം ഡൊമിനിക് തീം ഫ്രാന്‍സിന്റെ ഗായല്‍ മോന്‍ഫില്‍സിനെ 6-4, 6-4, 6-2ന് പരാജയപ്പെടുത്തി ക്വാര്‍ട്ടറിലെത്തി.
വനിതാ സിംഗിള്‍സില്‍ മാഡിസന്‍ കീസും അഷ്‌ലൈ ബാര്‍തിയും ക്വാര്‍ട്ടറില്‍ കടന്നു. ലോക ഒന്നാം നമ്പര്‍ താരം നവോമി ഒസാക്കയെ അട്ടിമറിച്ച് പ്രീ ക്വാര്‍ട്ടറിലെത്തിയ ചെക് താരം കാറ്റെറിന സിനിയാകോവയെ പരാജയപ്പെടുത്തിയാണ് അമേരിക്കയുടെ മാഡിസന്‍ കീസ് ക്വാര്‍ട്ടറിലേക്ക് പ്രവേശിച്ചത് (2-6, 4-6).
മുന്‍ ലോക ഒന്നാം നമ്പര്‍ താരം സെറീന വില്യംസിനെ പരാജയപ്പെടുത്തിയായിരുന്നു അമേരിക്കയുടെ തന്നെ സോഫിയ കെനിന്‍ പ്രീ ക്വാര്‍ട്ടറിലെത്തിയത്. പ്രീ ക്വാര്‍ട്ടറില്‍ ആസ്‌ത്രേലിയയുടെ ലോക എട്ടാം നമ്പര്‍ താരം അഷ്‌ലൈ ബാര്‍തിയോട് പരാജയപ്പെടുകയായിരുന്നു (3-6, 6-3, 0-6). ആദ്യ സെറ്റ് കൈവിട്ട ശേഷം രണ്ടാം സെറ്റില്‍ ശക്തമായി തിരിച്ചടിച്ച കെനിനെ മൂന്നാം സെറ്റില്‍ ഒറ്റ പോയിന്റ് പോലും നല്‍കാതെ വെറും കാഴ്ചക്കാരിയാക്കിയാണ് ബാര്‍തി ക്വാര്‍ട്ടറിലേക്ക് കടന്നത്.