മലപ്പുറം: സാധാരണക്കാര്‍ക്ക് ഉപയോഗപ്രദമാകുംവിധം ജനകീയ ആരോഗ്യനയം രൂപവത്കരിക്കുമെന്ന് ആരോഗ്യ മന്ത്രി കെ.കെ ശൈലജ അറിയിച്ചു. മലപ്പുറത്ത് കുത്തിവയ്പ് ശാക്തീകരണവുമായി  ബന്ധപ്പെട്ടു നടന്ന അവലോകന യോഗത്തില്‍ സംസാരിക്കുകയായിരുന്നു മന്ത്രി. ആറു മാസത്തിനകം എല്ലാ പി.എച്ച്.സി കളിലും ഡോക്ടര്‍മാരെ നിയമിക്കും. അപ്‌ഗ്രേഡ് ചെയ്ത ആരോഗ്യകേന്ദ്രങ്ങളില്‍ തസ്തിക നിര്‍ണയം പൂര്‍ത്തിയാക്കാനുള്ള ശ്രമം നടക്കുന്നുണ്ടെന്നും എന്നാല്‍ സര്‍ക്കാര്‍ ആശുപത്രികളില്‍ ജോലി ചെയ്യാന്‍ സന്നദ്ധരായ ഡോക്ടര്‍മാരുണ്ടാവണമെന്നും മന്ത്രി പറഞ്ഞു. ചില മതസംഘടനകള്‍ കുത്തിവയ്പിന് എതിരാണെന്ന പ്രചാരണം വാസ്തവവിരുദ്ധമാണ്.
പരിപാടിയില്‍ പങ്കെടുത്ത ജനപ്രതിനിധികളും മതനേതാക്കളും കുത്തിവയ്പിന് പൂര്‍ണ പിന്തുണ പ്രഖ്യാപിച്ചു.  കുത്തിവയ്പിനു വിരുദ്ധമായ അഭിപ്രായങ്ങള്‍ പ്രചരിപ്പിക്കുന്നതു തടയേണ്ടതാണ്. വിജയകരമാണെന്നു തെളിഞ്ഞ ശാസ്ത്രീയമായ ഒരു പ്രതിരോധ സംവിധാനം നിഷേധിക്കുന്നത് ഖേദകരമാണെന്നും മന്ത്രി പറഞ്ഞു. മഴക്കാല പൂര്‍വ ശുചീകരണ പ്രവര്‍ത്തനങ്ങള്‍ പൊതുജനങ്ങള്‍ കാര്യക്ഷമമായി ഏറ്റെടുക്കണം.
തദ്ദേശ സ്വയംഭരണ സ്ഥാപനങ്ങള്‍ ഇക്കാര്യത്തില്‍ ജാഗ്രത പുലര്‍ത്തണം. മാലിന്യ നിര്‍മാര്‍ജനവുമായി ബന്ധപ്പെട്ട നിബന്ധനകള്‍ പാലിക്കാത്തവരെ നിയമാനുസൃതമായ വകുപ്പുകള്‍ പ്രകാരം അനുസരിപ്പിക്കണമെന്നും മന്ത്രി നിര്‍ദേശിച്ചു.