കല്‍പ്പറ്റ: ആധാര്‍ എന്റോള്‍മെന്റിന് ഐറിസ് നിര്‍ബന്ധമാക്കിയ ഉത്തരവ് പിന്‍വലിക്കണമെന്നാവശ്യപ്പെട്ട് നാളെ മുതല്‍ 72 മണിക്കൂര്‍ (മൂന്നു ദിവസം) എന്റോള്‍മെന്റ് നിര്‍ത്തിവച്ച് പ്രതിഷേധിക്കുമെന്ന് എ.ഐ.ടി.ഇ അക്ഷയ സ്‌റ്റേറ്റ് കമ്മിറ്റി അറിയിച്ചു.
ഓരോ എന്റോള്‍മെന്റിനും ഐറിസ് ഉപയോഗിക്കുന്നത് മൂലം ഓപറേറ്റര്‍മാര്‍ വലിയ ആരോഗ്യപരമായ ബുദ്ധിമുട്ടാണ് നേരിടുന്നത്. കണ്ണില്‍ നിന്ന് വെള്ളം വരിക, ചൊറിച്ചില്‍ അനുഭവപ്പെടുക, ഉറക്കമില്ലായ്മ എന്നിവ ഇതിന്റെ ഭാഗമായി അനുഭവപ്പെടുകയാണ്. ഹൈ ഇന്റന്‍സിറ്റി ഇന്‍ഫ്രാറെഡ് രശ്മികള്‍ ഓരോ എന്റോള്‍മെന്റിനും കണ്ണിലേക്ക് അടിക്കുമ്പോള്‍ അത് കണ്ണിനുണ്ടാക്കുന്ന പ്രത്യാഘാതം ചെറുതല്ല. അതിനാല്‍ ഈ ഉത്തരവ് പിന്‍വലിപ്പിക്കാന്‍ ആവശ്യമായ ഇടപെടല്‍ നടത്താന്‍ അധികാരികള്‍ തയാറാകണമെന്നും അല്ലെങ്കില്‍ അനിശ്ചിതകാല സമരമടക്കമുള്ള മാര്‍ഗങ്ങളിലേക്ക് കടക്കാന്‍ തങ്ങള്‍ നിര്‍ബന്ധിതരാകുമെന്നും വാര്‍ത്താക്കുറിപ്പില്‍ പറഞ്ഞു. മുഴുവന്‍ ജനങ്ങളും സഹകരിക്കണമെന്നും അവര്‍ അഭ്യര്‍ഥിച്ചു.