ചേളാരി: സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ഈ അധ്യയന വര്‍ഷം മുതല്‍ ആരംഭിക്കുന്ന സമസ്ത വിമണ്‍സ് ഇസ്‌ലാമിക് ആര്‍ട്‌സ് കോളജിന്റെ സംസ്ഥാനതല ഉദ്ഘാടനം ജൂണ്‍ ഏഴിന് വെള്ളിയാഴ്ച വൈകിട്ട് നാലിന് പൂക്കോട്ടൂര്‍ ഖിലാഫത്ത് മെമ്മോറിയല്‍ ഇസ്‌ലാമിക് സെന്ററില്‍ നടക്കും. എസ്.എസ്.എല്‍.സിക്ക് ശേഷം മതപഠനത്തോടൊപ്പം പ്ലസ്ടു പഠനവും ഉറപ്പുവരുത്തുന്ന ദ്വിവത്സര ഫാളില കോഴ്‌സും തുടര്‍ന്ന് മൂന്ന് വര്‍ഷം ഡിഗ്രിയോടൊപ്പം ഫളീല കോഴ്‌സുമാണ് സമസ്ത വിമണ്‍സ് ഇസ്‌ലാമിക് ആര്‍ട്‌സ് കോളജ് വിഭാവനം ചെയ്യുന്നത്. ഈ വര്‍ഷം 87 കോളജുകള്‍ക്കാണ് സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് അംഗീകാരം നല്‍കിയത്.
മുഴുവന്‍ കോളജുകളിലും ജൂണ്‍ 10ന് ക്ലാസുകള്‍ ആരംഭിക്കും. പൂക്കോട്ടൂര്‍ ഖിലാഫത്ത് കാംപസില്‍ സംസ്ഥാനതല ഉദ്ഘാടനം പാണക്കാട് സയ്യിദ് ഹൈദരലി ശിഹാബ് തങ്ങള്‍ നിര്‍വഹിക്കും. സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ അധ്യക്ഷനാകും. സമസ്ത ജന.സെക്രട്ടറി കെ. ആലിക്കുട്ടി മുസ്‌ലിയാര്‍ മുഖ്യപ്രഭാഷണം നടത്തും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് ജന. സെക്രട്ടറി എം.ടി അബ്ദുല്ല മുസ്‌ലിയാര്‍ കോഴ്‌സ് സംബന്ധിച്ച് വിശദീകരണം നല്‍കും. സമസ്ത കേരള ഇസ്‌ലാം മത വിദ്യാഭ്യാസ ബോര്‍ഡ് എക്‌സിക്യൂട്ടീവ് അംഗങ്ങളും സമസ്തയുടെയും പോഷക സംഘടനകളുടെയും നേതാക്കളും മറ്റു പൗരപ്രമുഖരും സംബന്ധിക്കും.