ചെന്നൈ: വെള്ളിയാഴ്ച രാവിലെ കാണാതായ വ്യോമസേനയുടെ എ.എന്‍ 32  വിമാനത്തിനായുള്ള തിരച്ചില്‍ ഊര്‍ജിതമാക്കി. കൂടുതല്‍ സജ്ജീകരണങ്ങളോടെ തിരച്ചില്‍ തുടരുന്നതായി നാവികസേനാ മേധാവി സുനില്‍ ലാംബ അറിയിച്ചു. വിമാനത്തിലുണ്ടായിരുന്ന സൈനികരുടെയും ജോലിക്കാരുടെയും കുടുംബങ്ങളുമായി നിരന്തരം സമ്പര്‍ക്കം പുലര്‍ത്തുന്നതായും അദ്ദേഹം അറിയിച്ചു.

29 പേരുമായി ചെന്നൈയിലെ താംബരത്ത് നിന്ന് ആന്‍ഡമാനിലെ പോര്‍ട്ട് ബ്ലെയറിലേക്ക് പുറപ്പെട്ടതായിരുന്നു വിമാനം. വെള്ളിയാഴ്ച രാവിലെ 8.30ന് പറന്നുയര്‍ന്ന വിമാനം പതിനഞ്ച് മിനിറ്റിനുള്ളില്‍ അപ്രത്യക്ഷമായി. ബംഗാള്‍ ഉള്‍ക്കടലിന് മുകളില്‍വച്ചാണ് വിമാനം റഡാറുമായുള്ള ബന്ധം വിച്ഛേദിക്കപ്പെട്ടത്. പ്രതികൂല കാലാവസ്ഥയിലും വിമാനം കണ്ടെത്താനുള്ള ശ്രമങ്ങള്‍ തുടരുകയാണ്. 18 കപ്പലുകളും ഒരു മുങ്ങിക്കപ്പലും നിരവധി വിമാനങ്ങളും ഹെലികോപ്റ്ററുകളും തിരച്ചിലിനു രംഗത്തുണ്ട്.