തലശ്ശേരി: വടകര ലോക്‌സഭാ മണ്ഡലത്തില്‍ സ്വതന്ത്രസ്ഥാനാര്‍ഥിയായി മത്സരിച്ച സി.ഒ.ടി നസീറിനെ വധിക്കാന്‍ ശ്രമിച്ച കേസില്‍ ഒരു പ്രതിയെ കൂടി അന്വേഷണ സംഘം അറസ്റ്റു ചെയ്തു. കൊളശ്ശേരിയിലെ വിശ്വാസ് നിവാസില്‍ വി.കെ വിശ്വാസാ (25) ആണ് അറസ്റ്റിലായത്. വധശ്രമത്തില്‍ നേരിട്ടു പങ്കെടുത്ത റോഷന്‍ എന്ന യുവാവിന് തമിഴ്‌നാട്ടിലെ ഹൊസൂരില്‍ ഒളിച്ചു താമസിക്കാന്‍ സൗകര്യം ഏര്‍പ്പെടുത്തി നല്‍കിയാണ് ഇയാളെ അറസ്റ്റുചെയ്തതെന്ന് പൊലിസ് പറഞ്ഞു.

മെയ് 18നായിരുന്നു തലശ്ശേരിയിലെ കായ്യത്ത്‌റോഡ് പരിസരത്ത് വച്ച് സി.ഒ.ടി നസീറിനെ സംഘം ചേര്‍ന്ന് വെട്ടിപ്പരുക്കേല്‍പ്പിച്ചത്. കേസുമായി ബന്ധപ്പെട്ട് പൊന്ന്യംവെസ്റ്റ് ചേരിപുതിയ വീട്ടില്‍ കെ. അശ്വന്ത് (20), കൊളശ്ശേരി കളരി മുക്കിലെകുന്നി നേരിമിത്തല്‍ വി.കെ സോജിത്ത് (25) എന്നിവരെ നേരത്തെ അറസ്റ്റുചെയ്തിരുന്നു. അക്രമത്തിനു പിന്നില്‍ ജനപ്രതിനിധി ഉള്‍പ്പെടെയുള്ളവര്‍ക്ക് പങ്കുള്ളതായി പൊലിസിന് നല്‍കിയ മൊഴിയില്‍ നസീര്‍ പറഞ്ഞിരുന്നു.