മാഡ്രിഡ്: ഇടവേളക്ക് ശേഷം വീണ്ടും ലാ ലിഗയില്‍ ബാഴ്‌സലോണയും റയല്‍ മാഡ്രിഡും ഇന്നിറങ്ങും. റിയല്‍ സോസിഡാഡുമായി വൈകീട്ട് 7.45നാണ് ബാഴ്‌സലോണയുടെ മത്സരം. രാത്രി 12.15 അത്‌ലറ്റിക്കോ ബില്‍ബാവോയേയാണ് റയല്‍ മാഡ്രിഡ് നേരിടുന്നത്. നിലവില്‍ ലീഗില്‍ ബാഴ്‌സലോണയും റയല്‍ മാഡ്രിഡുമാണ് ഒന്നും രണ്ടും സ്ഥാനത്ത് നില്‍ക്കുന്നത്. ഇരു ടീമുകളും മൂന്ന് മത്സരത്തിലും ജയിച്ചിട്ടുണ്ടെങ്കിലും ഗോള്‍ ശരാശരിയില്‍ ബാഴ്‌സലോണയാണ് ഒന്നാം സ്ഥാനത്തുള്ളത്.
വിശ്രമത്തിന് ശേഷം സൂപ്പര്‍ താരം ലയണല്‍ മെസ്സി ടീമിനൊപ്പം ചേര്‍ന്നിട്ടുണ്ട്. ഇന്നത്തെ മത്സരത്തില്‍ ആദ്യ ഇലവിനില്‍ താരം ഇറങ്ങും. ക്രിസ്റ്റ്യാനോ റൊണാള്‍ഡോ യുവന്റസിലേക്ക് പോയതിന് ശേഷം റയലിന് താളം തെറ്റിയിട്ടില്ലെങ്കിലും ഇനിയുള്ള മത്സരങ്ങല്‍ നിര്‍ണായകമായത്. ടീമിലെത്തിയ ബ്രസീലിയന്‍ സൂപ്പര്‍ താരം വിനീഷ്യസ് ജൂനിയര്‍ മികച്ച ഫോമിലുള്ളത് ടീമിന് കരുത്താണ്. ക്രിസ്റ്റിയാനോക്ക് പകരക്കാരനായ ഗരത് ബെയിലും കരീം ബെന്‍സേമയുമാണിപ്പോള്‍ ടീമിന്റെ നെടും തൂണുകള്‍. റയലിന്റെ മൂന്ന് ജയത്തിലും ബെയിലിനും ബെന്‍സേമക്കും നിര്‍ണായക പങ്കുണ്ട്. വൈകീട്ട് 4.30ന് അത്‌ലറ്റിക്കോ മാഡ്രിഡും എയ്ബര്‍ തമ്മിലാണ് മത്സരം. മൂന്ന് മത്സരങ്ങള്‍ കളിച്ച അത്‌ലറ്റിക്കോ മാഡ്രിഡ് 10ാം സ്ഥാനത്താണുള്ളത്.
മൂന്ന് കളിയില്‍ ഒരു ജയം മാത്രമാണ് അത്‌ലറ്റിക്കോ നേടിയത്. രാത്രി 10ന് വലന്‍സിയയും റിയല്‍ ബെറ്റിസും തമ്മിലാണ് മത്സരം. ഇംഗ്ലീഷ് പ്രീമിയര്‍ ലീഗില്‍ ടോട്ടനവും ലിവര്‍പൂളും തമ്മില്‍ ഇന്ന് മത്സരിക്കുന്നുണ്ട്. വൈകീട്ട് അഞ്ചിനാണ് മത്സരം. മാഞ്ചസ്റ്റര്‍ സിറ്റി-ഫുള്‍ഹാം, ബേണ്‍മൗത്ത്-ലൈസസര്‍സിറ്റി, ന്യൂ കാസില്‍-ആഴ്‌സനല്‍, ഹഡേഴ്‌സ്ഫീല്‍ഡ്-ക്രിസ്റ്റല്‍പാലസ്, ചെല്‍സി-കാര്‍ഡിഫ് സിറ്റി എന്നീ ടീമുകള്‍ വൈകീട്ട് 7.30ന് മത്സരിക്കാനിറങ്ങുന്നുണ്ട്. രാത്രി 10ന് വാട്‌ഫോര്‍ഡും മാഞ്ചസ്റ്റര്‍ യുനൈറ്റഡും തമ്മിലാണ് മത്സരം. ഫ്രഞ്ച് ലീഗില്‍ ലിയോണും സീനും തമ്മില്‍ രാത്രി 8.30ന് മത്സരത്തിനിറങ്ങുന്നുണ്ട്.