പൊന്നാനി: നാലുചുമരുകള്‍ക്കുള്ളില്‍ തളച്ചിടപ്പെട്ട ഭിന്നശേഷിക്കാര്‍ ആടിയും പാടിയും ഉല്ലാസയാത്ര നടത്തി. സങ്കടങ്ങള്‍ പേറി ജീവിക്കാന്‍ വിധിക്കപ്പെട്ട ഭിന്നശേഷിക്കാരായ വിദ്യാര്‍ഥികളെ പുറം ലോകത്തിലെത്തിച്ചു പൊന്നാനി നഗരസഭയാണ് കൂട്ടായ്മയുടെ യാത്രയും സംഘടിപ്പിച്ചത്.
നഗരസഭാ സെക്രട്ടറി കെ.കെ മനോജിന്റെയും ചെയര്‍മാന്‍ സി.പി.മുഹമ്മദ് കുഞ്ഞിയുടെയും താല്‍പര്യപ്രകാരമാണ് വിദ്യാര്‍ഥികള്‍ക്ക് വിനോദയാത്രയ്ക്ക് അവസരമൊരുങ്ങിയത്.
തൃശൂര്‍ മൃഗശാലയും പീച്ചി ഡാമും സന്ദര്‍ശിച്ച വിദ്യാര്‍ഥികള്‍ പുതിയലോകത്ത് ഏറെ ആഹ്ലാദഭരിതരായി. ബഡ്‌സ് റിഹാബിലിറ്റേഷന്‍ സെന്ററിലെ വിദ്യാര്‍ഥികള്‍ക്കൊപ്പം അധ്യാപകരും രക്ഷിതാക്കളും മാനേജ്‌മെന്റ് കമ്മിറ്റിയിലെ പ്രവര്‍ത്തകരും പങ്കാളികളായി.