തൊടുപുഴ: ഭാര്യയെ കൊലപ്പെടുത്തിയ കേസില്‍ ഭര്‍ത്താവിന് ജീവപര്യന്തം കഠിനതടവും 50,000 രൂപ പിഴയും വിധിച്ചു. വെള്ളിയാമറ്റം കീറ്റില്ലംകരിയില്‍ കൊച്ചുപുരയ്ക്കല്‍ ജയേഷ് ജോസഫിനെ(38)യാണ് ഭാര്യ അനിതയെന്ന് വിളിക്കുന്ന ശ്രീജ(33)യെ കൊലപ്പെടുത്തിയ കേസില്‍ കോടതി ശിക്ഷിച്ചത്. തൊടുപുഴ നാലാം അഡിഷണല്‍ കോടതി ജഡ്ജി വി.ജി ശ്രീദേവിയാണ് വിധി പ്രസ്താവിച്ചത്.
2014 മാര്‍ച്ച് 25നാണ് കേസിനാസ്പദമായ സംഭവം നടന്നത്. ജയേഷും ഭാര്യയും താമസിച്ചിരുന്ന ഞരളംപുഴ വീടിന് സമീപത്തെ റബ്ബര്‍ തോട്ടത്തിലാണ് ശ്രീജയുടെ മൃതദേഹം കണ്ടെത്തിയത്. സമീപവാസിയായ സ്ത്രീയുമായി ജയേഷിനുണ്ടായിരുന്ന ബന്ധമാണ് കുടുംബകലഹത്തിലേക്കും തുടര്‍ന്ന് കൊലപാതകത്തിലേക്കും നയിച്ചത്. സംഭവദിവസം സ്ത്രീയുമായുള്ള ബന്ധത്തെച്ചൊല്ലി ജയേഷും ഭാര്യയും തമ്മില്‍ തര്‍ക്കമുണ്ടായിരുന്നു. തുടര്‍ന്ന് അനിത സമീപത്തെ റബര്‍ തോട്ടത്തിലേക്ക് കയറിപ്പോയി. അനിതയെ പിന്തുടര്‍ന്ന ജയേഷ് റബര്‍ തോട്ടത്തില്‍ വച്ച് ഷാള്‍ കഴുത്തില്‍ മുറുക്കി കൊലപ്പെടുത്തിയെന്നാണ് കേസ്.
തുടര്‍ന്ന് അനിതയെ കാണാനില്ലെന്ന് കാട്ടി ജയേഷ് കാഞ്ഞാര്‍ പൊലിസില്‍ പരാതി നല്‍കി. നാട്ടുകാര്‍ക്കൊപ്പം അന്വേഷണം നടത്താനും ജയേഷ് കൂടെനിന്നിരുന്നു. തുടര്‍ന്നുള്ള അന്വേഷണത്തില്‍ ജയേഷാണ് കൊലയ്ക്കുപിന്നിലെന്ന് പൊലിസിന് ബോധ്യപ്പെട്ടു. ജീവപര്യന്തം കൂടാതെ തെളിവുനശിപ്പിച്ചതിന് 7 വര്‍ഷം തടവും 25,000 രൂപ പിഴയും കോടതി വിധിച്ചിട്ടുണ്ട്. കാഞ്ഞാര്‍ സി.ഐ ആയിരുന്ന പയസ് ജോര്‍ജാണ് കേസ് അന്വേഷിച്ചത്. പ്രോസിക്യൂഷന് വേണ്ടി അഡി. പബ്ലിക് പ്രോസിക്യൂട്ടര്‍ എബി ഡി. കോലോത്ത് ഹാജരായി.