ഇസ്‌ലാമാബാദ്: മുംബൈ ഭീകരാക്രമണ സൂത്രധാരന്‍ ഹാഫിസ് സഈദിന്റെ സംഘടനകള്‍ക്കു പ്രവര്‍ത്തനാനുമതി നല്‍കി പാകിസ്താന്‍ സുപ്രിം കോടതി. ഹാഫിസ് സഈദിന്റെ ജമാഅത്തുദ്ദഅ്‌വ(ജെ.യു.ഡി), ഫലാഹെ ഇന്‍സാനിയ്യത് ഫൗണ്ടേഷന്‍(എഫ്.ഐ.എഫ്) എന്നീ സംഘടനകള്‍ക്കാണ് രാജ്യത്തു പ്രവര്‍ത്തിക്കാന്‍ അനുമതി നല്‍കി ഉത്തരവ് പുറപ്പെടുവിച്ചത്.
ജെ.യു.ഡിയെയും എഫ്.ഐ.എഫിനെയും ക്ഷേമപ്രവര്‍ത്തനങ്ങള്‍ തുടരാന്‍ അനുവദിച്ചുകൊണ്ടുള്ള ലാഹോര്‍ ഹൈക്കോടതിയുടെ ഉത്തരവിനെതിരേ പാക് സര്‍ക്കാര്‍ സമര്‍പ്പിച്ച അപ്പീല്‍ പരിഗണിക്കുകയായിരുന്നു സുപ്രിംകോടതി. ഏപ്രില്‍ അഞ്ചിനായിരുന്നു ലാഹോര്‍ ഹൈക്കോടതിയുടെ വിധി പുറത്തുവന്നത്.
ഇരുസംഘടനകളും നടത്തിവരുന്ന സാമൂഹിക പ്രവര്‍ത്തനങ്ങളില്‍ സര്‍ക്കാര്‍ ഇടപെടുന്നത് തടഞ്ഞ ഹൈക്കോടതി സംഘടനകള്‍ക്ക് നിയമപരമായ പ്രവര്‍ത്തനങ്ങള്‍ തുടരാനും അനുമതി നല്‍കിയിരുന്നു.
ജമാഅത്തുദ്ദഅ്‌വ, ഫലാഹെ ഇന്‍സാനിയത്ത് അടക്കമുള്ള തീവ്രവാദ സ്വഭാവമുള്ള സംഘടനകളെ സംഭാവന സ്വീകരിക്കുന്നതില്‍നിന്നു വിലക്കി നേരത്തെ പാക് സര്‍ക്കാര്‍ ഉത്തരവ് പുറപ്പെടുവിച്ചിരുന്നു. യു.എന്‍ രക്ഷാസമിതിയുടെ ഉപരോധ പട്ടികയിലുള്ള സംഘടനകള്‍ക്കായിരുന്നു ഈ വിലക്ക്. എന്നാല്‍, സര്‍ക്കാര്‍ ഉത്തരവിനെതിരേ സംഘടനകള്‍ കോടതിയെ സമീപിക്കുകയായിരുന്നു.
കോടതി വിധി നീതിയുടെയും സത്യത്തിന്റെയും വിജയമാണെന്ന് ഹാഫിസ് സഈദ് പ്രതികരിച്ചു. ജെ.യു.ഡിക്കും എഫ്.ഐ.എഫിനും കീഴില്‍ അരലക്ഷത്തോളം സന്നദ്ധ പ്രവര്‍ത്തകരും നൂറുകണക്കിനു തൊഴിലാളികളും പ്രവര്‍ത്തിക്കുന്നുണ്ട്. ജെ.യു.ഡിക്കു മാത്രമായി 300ലേറെ വിദ്യാഭ്യാസ കേന്ദ്രങ്ങളും ആശുപത്രികളും പ്രസാധനാലയങ്ങളുമുണ്ട്.