തേഞ്ഞിപ്പലം: കാലിക്കറ്റ് സര്‍വകലാശാലാ സിന്‍ഡിക്കേറ്റ് തെരഞ്ഞെടുപ്പ് ഇന്ന് നടക്കും.
രാവിലെ പത്ത് മുതല്‍ ഉച്ചയ്ക്ക് ഒന്നു വരെ സെനറ്റ് ഹൗസില്‍വച്ചാണ് തെരഞ്ഞെടുപ്പ് നടത്തുന്നത്.
വോട്ടെണ്ണല്‍ ഉച്ചക്ക് രണ്ടിന് സെനറ്റ് ഹൗസില്‍ തന്നെ നടക്കും. 104 അംഗ സെനറ്റില്‍ വിവിധ വിഭാഗങ്ങളിലെ 11 സീറ്റുകളിലേക്കായി 25 ഉം ഒരു വിദ്യാര്‍ഥി പ്രതിനിധിയുടെ ഒഴിവിലേക്ക് രണ്ടും സ്ഥാനാര്‍ഥികളാണ് മത്സരരംഗത്തുള്ളത്. എല്‍.ഡി.എഫിന്റെ 16 ഉം യു.ഡി എഫിന്റെ ഒന്‍പതും സ്ഥാനാര്‍ഥികള്‍ മത്സരിക്കുന്നുണ്ട്.
സെനറ്റ് അംഗങ്ങളില്‍ എല്‍.ഡി.എഫിന് നിലവില്‍ 70 അംഗങ്ങളുണ്ട്. യു.ഡി.എഫിന് 34 അംഗങ്ങളാണുള്ളത്.
സെനറ്റിലെ അംഗബലം കണക്കാക്കിയാല്‍ തെരഞ്ഞെടുക്കപ്പെടുന്ന പുതിയ സിന്‍ഡിക്കേറ്റിലും എല്‍.ഡി.എഫിനായിരിക്കും ഭൂരിപക്ഷം.
യു.ഡി.എഫ് സ്ഥാനാര്‍ഥികളില്‍ ഒരു വിദ്യാര്‍ഥി പ്രതിനിധി ഉള്‍പ്പടെ മുസ്‌ലിം ലീഗിന് നാലും കോണ്‍ഗ്രസിന് അഞ്ചും സ്ഥാനാര്‍ഥികള്‍ മത്സരരംഗത്തുണ്ട്.
എം.എസ്.എഫിന്റേയും എസ്.എഫ്.ഐയുടെയും സ്ഥാനാര്‍ഥികളാണ് വിദ്യാര്‍ഥി പ്രതിനിധിസ്ഥാനത്തേക്ക് നേരിട്ട് മത്സരിക്കുന്നത്. പ്രിന്‍സിപ്പാള്‍ മണ്ഡലത്തില്‍ നിന്നുള്ള രണ്ട് സീറ്റുകളിലേക്കുള്ള തെരഞ്ഞെടുപ്പ് പിന്നീട് നടക്കും.