പൊന്നാനി: പൊന്നാനിയിലെ കടല്‍ തീരങ്ങളില്‍ കാറ്റാടി മരങ്ങള്‍ നട്ടുപിടിപ്പിച്ചു തുടങ്ങി. വനവല്‍ക്കരണത്തിന്റെ ഭാഗമായാണ് കാറ്റാടി മരങ്ങള്‍ വെച്ചു പിടിപ്പിക്കുന്നത്. സംസ്ഥാന വനം വകുപ്പിന്റെ കീഴിലുള്ള സാമൂഹ്യ വനവല്‍ക്കരണ വിഭാഗവും പൊന്നാനി നഗരസഭയും സംയുക്തമായാണ് കാറ്റാടി മരങ്ങള്‍ കടല്‍ തീരങ്ങളില്‍ നട്ടുവളര്‍ത്തുന്നത്. പാലപ്പെട്ടി കാപ്പിരിക്കാട് മുതല്‍ പൊന്നാനി വരെയുള്ള ഭാഗങ്ങളില്‍ 5000 ലധികം കാറ്റാടി മരങ്ങളാണ് നടുന്നത്. പുതുപൊന്നാനി കടല്‍ തീരത്ത് നടന്ന കാറ്റാടിത്തൈ നടല്‍ സ്പീക്കര്‍ പി.ശ്രീരാമകൃഷ്ണന്‍ ഉദ്ഘാടനം ചെയ്തു.
ആവാസ വ്യവസ്ഥയുടെ നിലനില്‍പ്പിന് വനവല്‍ക്കരണത്തിന്റെ പ്രാധാന്യം മുന്നില്‍ കണ്ടാണ് ഇത്തരം പ്രവര്‍ത്തനങ്ങള്‍ നടത്തുന്നതെന്ന് സ്പീക്കര്‍ പറഞ്ഞു. പുതുപൊന്നാനി മേഖലയില്‍ നന്മ ക്ലബിന്റെ നേതൃത്വത്തില്‍ 2000 ലധികം മരങ്ങളാണ് നട്ടുപിടിപ്പിക്കുന്നത്. പൊന്നാനി നഗരസഭാ ചെയര്‍മാന്‍ സി.പി മുഹമ്മദ്കുഞ്ഞി, സ്റ്റാന്‍ഡിങ് കമ്മിറ്റി ചെയര്‍മാന്‍ ഒ.ഒ ശംസു, കൗണ്‍സിലര്‍മാരായ എ. നസിമോന്‍, എം. ഷമീറ,ജില്ലാ ഫോറസ്റ്റ് ഓഫീസര്‍ രാമചന്ദ്രന്‍, ഫോറസ്റ്റ് ജീവനക്കാരനായ രഘു, നന്മ ക്ലബ് അംഗങ്ങളായ പി.വി ഇല്യാസ്, പി.കെ കുഞ്ഞിമുഹമ്മദ് സംബന്ധിച്ചു.