തൃക്കരിപ്പൂര്‍: ഫുട്‌ബോള്‍ കളിക്കാനെത്തുന്നവരെ സ്വാഗതം ചെയ്തിരുന്ന തൃക്കരിപ്പൂര്‍ ഗവ. ഹയര്‍സെക്കന്‍ഡറി സ്‌കൂള്‍ മിനി സ്റ്റേഡിയത്തിനുചുറ്റും തള്ളിയിരുന്ന മാലിന്യങ്ങള്‍ കുഴിച്ചുമൂടി. ഇന്നലെ ആരോഗ്യവകുപ്പ് ഉദ്യോഗസ്ഥര്‍ എത്തിയാണ് സ്റ്റേഡിയത്തിന്റെ തെക്കുഭാഗത്ത് മാലിന്യങ്ങള്‍ കുഴിച്ചുമൂടിയത്. മാലിന്യം തള്ളുന്നവരെ കണ്ടെത്താന്‍ കഴിഞ്ഞില്ല. എന്നാല്‍, ഇനി മാലിന്യം തള്ളിയാല്‍ കര്‍ശന നടപടി സ്വീകരിക്കുമെന്ന് ആരോഗ്യവകുപ്പ് അധികൃതര്‍ അറിയിച്ചു.
സ്റ്റേഡിയത്തിനുചുറ്റും കുറ്റിക്കാടുകള്‍ വളര്‍ന്നതിനാല്‍ ഇരുട്ടിന്റെ മറവില്‍ ഇവിടെ മാലിന്യം തള്ളുന്നതു പതിവായിരുന്നു. പലപ്പോഴായി സ്‌കൂള്‍ അധികൃതര്‍ പരാതിപ്പെട്ടെങ്കിലും പരിഹാരമായിരുന്നില്ല. ഈ മാസം രണ്ടിനു 'സുപ്രഭാതം' ഇതുസംബന്ധിച്ച് വാര്‍ത്ത നല്‍കിയിരുന്നു. സ്ഥിരമായി കളിക്കാനെത്തുന്ന മുതിര്‍ന്നവരും ഫുട്‌ബോള്‍ പരിശീലനത്തിനെത്തുന്ന സ്‌കൂള്‍ കുട്ടികളും മാലിന്യത്തില്‍നിന്നുള്ള ദുര്‍ഗന്ധം കാരണം പരിശീലനം പെട്ടെന്നുനിര്‍ത്തി പോകാറാണ് പതിവ്. ഇതിനിടെ മുന്‍ ഇന്ത്യന്‍ താരം എം. സുരേഷിന്റെ നേതൃത്വത്തിലുള്ള സണ്‍ഡെ ഫുട്‌ബോള്‍ ടിമിന്റെ നേതൃത്വത്തില്‍ മൈതാനത്തിന്റെ പുറത്തുള്ള ഭാഗങ്ങള്‍ ശുചീകരിച്ചിരുന്നെങ്കിലും മാലിന്യങ്ങള്‍ തള്ളുന്നതില്‍നിന്ന് ആരും പിന്മാറിയിരുന്നില്ല. കഴിഞ്ഞവര്‍ഷമാണ് ഏഴുലക്ഷം രൂപ ചെലവഴിച്ച് മിനിസ്റ്റേഡിയം നവീകരിച്ചത്. തൃക്കരിപ്പൂര്‍ പഞ്ചായത്തിലെയും പരിസര പഞ്ചായത്തുകളിലെയും ഒട്ടേറെ ഫുട്‌ബോള്‍ താരങ്ങള്‍ കളിച്ചു വളര്‍ന്നതും കളിക്കാന്‍ ഉപയോഗിക്കുന്നതുമാണ് തൃക്കരിപ്പൂര്‍ മിനി സ്റ്റേഡിയം.