കൊച്ചി: ഇത്തവണത്തെ ഹയര്‍ സെക്കന്‍ഡറി പരീക്ഷയില്‍ ജില്ലയ്ക്ക് 86.44 ശതമാനം വിജയം. മുന്‍വര്‍ഷത്തെ അപേക്ഷിച്ച് നില മെച്ചപ്പെടുത്തിയ ജില്ല സംസ്ഥാനതലത്തില്‍ കണ്ണൂരിനുപിന്നില്‍  രണ്ടാം സ്ഥാനവും നേടി.ആകെ 205 സ്‌കൂളുകളില്‍ നിന്നായി 31,803 പേരാണ് ഇത്തവണ പരീക്ഷയെഴുതിയത്. ഇതില്‍ 27,489 പേര്‍ ഉപരിപഠനത്തിന് യോഗ്യത നേടി. ഏറ്റവും കൂടുതല്‍ പേര്‍ എ പ്ലസ് നേടിയതും ജില്ലയില്‍ നിന്നാണ്.
1261 പേരാണ് സമ്പൂര്‍ണ്ണ എപ്ലസ് നേടിയത്. കഴിഞ്ഞ വര്‍ഷം  945 വിദ്യാര്‍ഥികള്‍ മാത്രമായിരുന്നു മുഴുവന്‍ വിഷയങ്ങള്‍ക്കും എ പ്ലസ് നേടിയിരുന്നത്.അനഘ കൃഷ്ണ എ, അഭിജിത്ത് എം (പെരുമ്പാവൂര്‍ സര്‍ക്കാര്‍ ബോയ്‌സ് എച്ച്.എസ്.എസ്), അനാര്‍ യു, ലക്ഷ്മി സജീവ് കെ, ഗൗരി രഞ്ജിത (എസ്.എന്‍.എം.എച്ച്.എസ്.എസ്. മൂത്തകുന്നം), ഗൗതംകൃഷ്ണ എസ് (വളയന്‍ചിരങ്ങര എച്ച്.എസ്.എസ്) എന്നിവര്‍ എല്ലാ വിഷയങ്ങള്‍ക്കും മുഴുവന്‍ മാര്‍ക്കും നേടി സമ്പൂര്‍ണ ജയം സ്വന്തമാക്കി.  2016ല്‍ 82.84 ശതമാനമായിരുന്ന വിജയശതമാനം ഉയര്‍ത്താന്‍ കഴിഞ്ഞെങ്കിലും  2015ലെ  വിജയശതമാനമായ 86.89  ആവര്‍ത്തിക്കാനായില്ല.
വൊക്കേഷണല്‍ ഹയര്‍സെക്കന്‍ഡറി പരീക്ഷയില്‍ 79.44 ശതമാനമാണ് ജില്ലയിലെ വിജയം.കഴിഞ്ഞ വര്‍ഷത്തേക്കാള്‍ വിജയ ശതമാനം വര്‍ധിച്ചു. 78.42 ആയിരുന്നു കഴിഞ്ഞ തവണ വിജയ ശതമാനം.തിരുമാറാടി ഗവ.വി.എച്ച്.എസ്.എസ് , അമ്പലമുകള്‍ ഗവ.വി.എച്ച്.എസ്.എസ്  എന്നീ സ്‌കൂളുകള്‍ നൂറു ശതമാനം വിജയം നേടി. നേര്യമംഗലം ഗവ.വി.എച്ച്.എസ്.എസ,്  കളമശേരി ഗവ.വി.എച്ച്.എസ്.എസ്, ഇരിങ്ങോല്‍ ഗവ.വി.എച്ച്.എസ്.എസ് എന്നീ സ്‌കൂളുകള്‍ക്ക് ഒരു വിദ്യാര്‍ഥി തോറ്റത് കാരണം നൂറു ശതമാനം വിജയം നഷ്ടമായി. നേര്യമംഗലത്ത് 59, കളമശേരിയില്‍ 46, ഇരിങ്ങോലില്‍ 57 വിദ്യാര്‍ഥികളുമാണ് പരീക്ഷയെഴുതിയിരുന്നത്.  ഇത്തവണ 2495 വിദ്യാര്‍ഥികളാണ് പരീക്ഷ എഴുതിയത്. ഇതില്‍ 1982 പേര്‍ പാര്‍ട്ട് ഒന്ന്,രണ്ട്, മൂന്ന് വിഭാഗങ്ങളില്‍ വിജയം നേടി. 2173 പേര്‍ പാര്‍ട്ട് ഒന്നിലും രണ്ടിലുമായി മാത്രം വിജയം കൈവരിച്ചു.
ഓപ്പണ്‍ സ്‌കൂള്‍ വിഭാഗത്തില്‍ പരീക്ഷയെഴുതിയ  4672 പേരില്‍ 1669 വിദ്യാര്‍ഥികള്‍ ഉപരിപഠനത്തിന് അര്‍ഹരായി. 35.72 ശതമാനമാണ് വിജയം.സമ്പൂര്‍ണ്ണ എപ്ലസ് രണ്ടുപേര്‍ നേടി.ടെക്‌നിക്കല്‍ സ്‌കൂള്‍ വിഭാഗത്തില്‍ പരീക്ഷയെഴുതിയ 485 വിദ്യാര്‍ഥികളില്‍ 424 പേരും വിജയിച്ചു. 87.42 ആണ് വിജയശതമാനം. 18 വിദ്യാര്‍ഥികള്‍ എല്ലാ വിഷയങ്ങള്‍ക്കും എ പ്ലസ് നേടി.