കോഴിക്കോട്: വീടിന് മുന്‍വശത്തെ തുറന്നിട്ട വാതിലിലൂടെ കാട്ടുപന്നികള്‍ അകത്തു കയറി. കൂരാച്ചുണ്ട് പൂവത്തുംചോല പാലമലയില്‍ മോഹനന്റെ വീട്ടിലാണ് സംഭവം. രാവിലെ 7.30ന് വീടിന് അകത്തു കയറിയ രണ്ടു പന്നികളില്‍ ഒന്നിനെ മയക്കുവെടിവച്ചു.

മുന്‍വശത്തെ തുറന്നിട്ട വാതിലിലൂടെയാണ് കാട്ടുപന്നികള്‍ അകത്തു കയറിയത്. കിടപ്പുമുറിയില്‍ പ്രവേശിച്ച പന്നികള്‍ കട്ടിലിലും മറ്റും കയറി. ഇതിനിടെ വീടിന്റെ വാതില്‍ അടച്ച് മോഹനനും കുടുംബവും പുറത്ത് ഇറങ്ങിയിരുന്നു.

സംഭവം അറിഞ്ഞ് നാട്ടുകാര്‍ സംഘടിച്ചെത്തി വനം വകുപ്പിനെതിരെ ഡി.എഫ്.ഒ സംഭവസ്ഥലത്ത് എത്തണമെന്നാവശ്യപ്പെട്ട് പ്രതിഷേധിച്ചു.

വനം വകുപ്പ് ഉദ്യോഗസ്ഥരും കൂരാച്ചുണ്ട് പൊലിസും സ്ഥലത്തെത്തി ആളുകളെ അനുനയിപ്പിച്ച് പന്നികളെ മയക്കുവെടി വയ്ക്കാന്‍ തീരുമാനിച്ചു. ഒരു പന്നിയെ വെടി വച്ചതിന് പിന്നാലെ വനപാലകരുടെ തോക്ക് തകരാറിലായി. രണ്ടാമത്തെ പന്നിയെയും വെടിവയ്ക്കാനുള്ള ശ്രമം തുടരുകയാണ്.