ഒറ്റപ്പാലം: ഭാര്യയെ വധിക്കാന്‍ ശ്രമിച്ച കേസില്‍ ഭര്‍ത്താവിന് അഞ്ചുവര്‍ഷം കഠിന തടവ്.തൃത്താല കോട്ടോപ്പാടത്ത് വെങ്കര സുബ്രഹ്മണ്യ(51)നെയാണ് ജഡ്ജി പി രാഗിണി കഠിനതടവിന് വിധിച്ചത്. ഒറ്റപ്പാലം അഡീഷണല്‍ ജില്ലാ സെഷന്‍ കോടതിയാണ് ശിക്ഷ വിധിച്ചത്. ഐ.പി.സി 307ാം വകുപ്പ് പ്രകാരം അഞ്ച് വര്‍ഷം കഠിനതടവും 25000 രൂപ പിഴയും ഐ.പി.സി 324 വകുപ്പ് പ്രകാരം രണ്ടു വര്‍ഷംതടവും 5000 രൂപ പിഴയുമാണ് ശിക്ഷ.രണ്ടു വകുപ്പുകളിലുമായി അഞ്ച് വര്‍ഷം ശിക്ഷ അനുഭവിച്ചാല്‍മതി. പിഴയടക്കാത്ത സാഹചര്യമായാല്‍ ആറുമാസം കൂടി ശിക്ഷാകാലാവധി കൂടുമെന്നും കോടതി പറഞ്ഞു.
2017 ജൂണ്‍് 19നാണ് കേസിനാസ്പദമായ സംഭവം. ഭാര്യയായ കല്യാണി ഭര്‍ത്താവിന്റെ പീഡനം സഹിക്കവയ്യാതെ മൂന്ന് വര്‍ഷമായി വീടുവിട്ടിറങ്ങി വാടക വീട്ടില്‍ താമസിക്കവേ അന്നേദിവസം വൈകീട്ട് വാടക വീടിന്റെ മുറ്റത്തു വച്ച് വധിക്കാന്‍ ശ്രമം നടത്തിയതെന്നാണ് കേസ്. ഒറ്റപ്പാലം സി.ഐ പി അബ്ദുള്‍ മുനീര്‍, പട്ടാമ്പി സി.ഐ പി.വി രമേശ് എന്നിവര്‍ അന്വേഷണം നടത്തിയ കേസില്‍ അഡീഷണല്‍ പബ്ലിക് പ്രോസിക്യൂട്ടര്‍ കെ ഹരി ഹാജരായി.പിഴയായി അടക്കുന്ന തുക കേസില്‍ പരിക്കുപറ്റിയ കല്യാണിക്ക് നല്‍കാനും ഉത്തരവായി.