ബംഗളൂരു: വിമതനീക്കം ശക്തമായിരിക്കെ കര്‍ണാടകയില്‍ മന്ത്രിസഭാ വികസനം ബുധനാഴ്ച നടക്കും. ഇന്നലെ മുഖ്യമന്ത്രി എച്ച്.ഡി കുമാരസ്വാമി തന്നെയാണ് ഇക്കാര്യം അറിയിച്ചത്.
കോണ്‍ഗ്രസ്-ജെ.ഡി.എസ് സഖ്യ സര്‍ക്കാറിനെ പ്രതിസന്ധിയിലാക്കി വിമതനീക്കം ശക്തമാണ്. സര്‍ക്കാരിനെ അസ്ഥിരപ്പെടുത്തുന്ന രീതിയിലുള്ള ഭീഷണിയാണ് ഉയരുന്നത്.
ഗവര്‍ണര്‍ വാജുഭായ് വാലയുമായി കൂടിക്കാഴ്ച നടത്തിയ ശേഷമാണ് മന്ത്രിസഭാ വികസന കാര്യം മുഖ്യമന്ത്രി അറിയിച്ചത്.
മുഖ്യമന്ത്രിയും കോണ്‍ഗ്രസ് നേതാക്കളുമായി ഇതുസംബന്ധിച്ച് കഴിഞ്ഞ ദിവസം തന്നെ ചര്‍ച്ച നടത്തിയിരുന്നു.
മന്ത്രിസഭയിലേക്ക് പുതിയ അംഗങ്ങള്‍ വരുന്ന കാര്യം ഗവര്‍ണറെ അറിയിച്ചിട്ടുണ്ടെന്നും ഇതിനുള്ള അംഗീകാരം അദ്ദേഹം നല്‍കിയിട്ടുണ്ടെന്നും കുമാരസ്വാമി പറഞ്ഞു. ബുധനാഴ്ച രാവിലെ 11.30ന് പുതിയ മന്ത്രിമാര്‍ സത്യപ്രതിജ്ഞ ചെയ്യുമെന്നും അദ്ദേഹം പറഞ്ഞു.