കോഴിക്കോട്: ജില്ലയില്‍ കഴിഞ്ഞ അധ്യയന വര്‍ഷം അഞ്ചു സ്‌കൂളുകള്‍ക്കായിരുന്നു നൂറുമേനിയെങ്കില്‍ ഇത്തവണ ഏഴു സ്‌കൂളുകള്‍ ഈ നേട്ടം കൈവരിച്ചു. കോഴിക്കോട് ഹിമായത്തുല്‍ ഇസ്‌ലാം സ്‌കൂളാണ് ജില്ലയില്‍ ഏറ്റവും കൂടുതല്‍ പേരെ പരീക്ഷയ്ക്കിരുത്തി (181) നൂറുമേനി നേടിയ വിദ്യാലയം. കൊമേഴ്‌സില്‍ 15-ാം തവണയും സയന്‍സില്‍ മൂന്നാം തവണയുമാണ് ഹിമായത്തുല്‍ ഇസ്‌ലാം സ്‌കൂള്‍ നൂറുശതമാനം വിജയം നേടുന്നത്. ഇവിടെ നിന്ന് 16 വിദ്യാര്‍ഥികള്‍ മുഴുവന്‍ വിഷയങ്ങളിലും എ പ്ലസ് നേടി.
സെന്റ് ജോസഫ് ആംഗ്ലോ ഇന്ത്യന്‍ ഗേള്‍സ് സ്‌കൂള്‍ (168), ചേവായൂര്‍ പ്രസന്റേഷന്‍ എച്ച്.എസ്.എസ് (125), എസ്.എച്ച്.എച്ച്.എസ്.എസ് കോഴിക്കോട് (100), ഓക്‌സിലിയം നവജ്യോതി സ്‌കൂള്‍ കുന്ദമംഗലം (80), കൊളത്തറ കാലിക്കറ്റ് സ്‌കൂള്‍ ഫോര്‍ ഹാന്‍ഡികേപ്ഡ് സ്‌കൂള്‍ (54), എരഞ്ഞിപ്പാലം കരുണ സ്പീച്ച് ആന്‍ഡ് ഹിയറിങ് സ്‌കൂള്‍ (16) എന്നിവരാണ് നൂറുമേനി സ്വന്തമാക്കിയ മറ്റു സ്‌കൂളുകള്‍. ജില്ലയിലെ ഒരു സര്‍ക്കാര്‍ സ്‌കൂളും ഈ നേട്ടം സ്വന്തമാക്കിയില്ല എന്നത് ഇത്തവണത്തെ പ്രത്യേകതയാണ്.