ലണ്ടന്‍: ആസ്‌ത്രേലിയ വീണ്ടും പന്തു ചുരണ്ടല്‍ വിവദത്തില്‍. ഇന്നലെ ഇന്ത്യക്കെതിരേ ഓസീസ് സ്പിന്നര്‍ ആദം സാംപ പന്തുചുരണ്ടിയെന്നാണ് ആരോപണം. സംശയാസ്പദമായ വിഡിയോയും ചിത്രങ്ങളും ക്രിക്കറ്റ് ആരാധകര്‍ സോഷ്യല്‍ മീഡിയയില്‍ പങ്കുവച്ചിട്ടുണ്ട്.
ആസ്‌ത്രേലിയന്‍ ക്രിക്കറ്റിനെ പിടിച്ചുലച്ച സംഭവമായിരുന്നു പന്ത് ചുരണ്ടല്‍ വിവാദം. ദക്ഷിണാഫ്രിക്കക്കെതിരായ ടെസ്റ്റിലായിരുന്നു ആസ്‌ത്രേലിയക്ക് വലിയ നാണക്കേടുണ്ടാക്കിയ സംഭവം നടന്നത്. ഇപ്പോഴിതാ അതേ സംഭവം വീണ്ടും ടീമിന് പിന്നാലെയെത്തിയിരിക്കുകയാണ്. ഇതോടെ ഈ വിഷയത്തില്‍ ആസ്‌ത്രേലിയ വീണ്ടും നാണക്കേടിലേക്ക് വീണിരിക്കുകയാണ്.

സാംപ ഇക്കാര്യത്തില്‍ പ്രതികരിച്ചിട്ടില്ല. മത്സരത്തിനിടെ ഓരോ പന്തെറിയുമ്പോഴും ആദം സാംപ പോക്കറ്റില്‍ കൈയിടുന്നത് സംശയാസ്പദമാണെന്ന ആരോപണമാണ് ഉയരുന്നത്. ഇത് പന്തില്‍ കൃത്രിമം കാണിക്കുന്നതിന് വേണ്ടിയാണെന്ന് സോഷ്യല്‍ മീഡിയ ആരോപിക്കുന്നു.
അതേസമയം, സാംപയ്ക്ക് മത്സരത്തില്‍ തിളങ്ങാന്‍ സാധിച്ചിരുന്നില്ല. 6 ഓവര്‍ എറിഞ്ഞ താരം 50 റണ്‍സ് വഴങ്ങുകയും ചെയ്തിരുന്നു.