കൊണ്ടോട്ടി: പ്ലസ്ടു പരീക്ഷയില്‍ നൂറുമനി കൊയ്ത സ്‌കൂളും മുഴുവന്‍ മാര്‍ക്ക് നേടിയ വിദ്യാര്‍ഥിയും നാടിന് അഭിമാനമായി. മണ്ഡലത്തിലെ കക്കോവ് പി.എം.എസ്.എ.പി.ടി ഹയര്‍സെക്കന്‍ഡറി സ്‌കൂളും സ്‌കൂളിലെ വിദ്യാര്‍ഥിനി പി.വി ശരണ്യയുമാണ് പ്ലസ്ടു പരീക്ഷയില്‍ നാടിന് ഇരട്ടിമധുരം നല്‍കിയത്. സ്‌കൂളിലെ സയന്‍സില്‍ രണ്ടു ബാച്ചുകളിലും ഹ്യുമാനിറ്റീസ്, കൊമേഴ്‌സ് ബാച്ചികളിലുമായി 226 വിദ്യാര്‍ഥികളാണ് പരീക്ഷ എഴുതി നൂറ് ശതമാനം വിജയം നേടിയത്.
വാഴയൂര്‍ വര്‍ലോട്ടുമ്മല്‍ കൂലിപ്പണിക്കാരനായ രാജന്റെയും ശാരദയുടേയും മകളാണ് 1200 മാര്‍ക്ക് വാങ്ങിയ ശരണ്യ. അഞ്ചാം ക്ലാസ്സ് വരെ വാഴയൂര്‍ എ.എല്‍.പി സ്‌കൂളിലും തുടര്‍ന്ന് കക്കോവ് സ്‌കൂളിലുമാണ് ശരണ്യ പഠിച്ചത്. പ്ലസ് വണ്‍ പരീക്ഷയില്‍ മുഴുവന്‍ മാര്‍ക്ക് നേടിയ ശരണ്യ പ്ലസ്ടുവിലും വിജയം ആവര്‍ത്തിച്ചു.
കക്കോവ് സ്‌കൂളിലെ 33 വിദ്യാര്‍ഥികള്‍ ഇത്തവണ മുഴുവന്‍ വിഷയങ്ങളിലും എപ്ലസ് നേടി. 19 വിദ്യാര്‍ഥികള്‍ക്ക് ഒരു വിഷയത്തിലൊഴികെ മുഴുവന്‍ വിഷയത്തിലും എ പ്ലസ് നേടാനായി. കക്കോവ് സ്‌കൂള്‍ ഉള്‍പ്പടെ സംസ്ഥാനത്ത് 21 എയ്ഡഡ് സ്‌കൂളുകളാണ് ഈ വര്‍ഷം പ്ലസ്ടുവില്‍ നൂറ് ശതമാനം നേടിയത്. എസ്.എസ്.എല്‍.സി പരീക്ഷയിലും സ്‌കൂള്‍ നേട്ടം കൊയ്തിരുന്നു.