വാഴക്കാട്: ഗ്രാമം സുന്ദരം, മധുരം ജീവിതം പ്ലാസ്റ്റിക് വിമുക്ത വാഴക്കാട് പദ്ധതിയുടെ രണ്ടാംഘട്ടത്തിന്റെ ഭാഗമായി വീടുകളില്‍ നിന്നും കച്ചവട സ്ഥാപനങ്ങളില്‍ നിന്നും ശേഖരിച്ച പ്ലാസ്റ്റിക് മാലിന്യങ്ങള്‍ ഇന്ന് കയറ്റിയയക്കും. ജനപിന്തുണയോടെ ശേഖരിച്ച് വാര്‍ഡ് കേന്ദ്രങ്ങളില്‍ സൂക്ഷിച്ച മാലിന്യങ്ങള്‍ ഇന്നലെ പഞ്ചായത്തിലെ ഊര്‍ക്കടവ്, വാഴക്കാട്, എടവണ്ണപ്പാറ എന്നീ  പ്രധാന മൂന്ന് കേന്ദ്രങ്ങളിലേക്ക് നീക്കിയിരിക്കുകയാണ്.
ഇവിടങ്ങളില്‍ നിന്നും ഇന്ന് രാവിലെ കേരളത്തിന് പുറത്തുള്ള സംസ്‌കരണ പ്ലാന്റുകളിലേക്ക് കൊണ്ട് പോവുന്നതിനായി വാഹനത്തില്‍  കയറ്റും .അഞ്ചോ ആറോ ലോഡുകള്‍ ഉണ്ടാകുമെന്നാണ് കണക്കാക്കുന്നത്. ഇന്ന് വൈകിട്ട് നാലിന് എടവണ്ണപ്പാറ ബസ് സ്റ്റാന്റ് പരിസരത്ത് നിന്നും പ്ലാസ്റ്റിക് മാലിന്യങ്ങള്‍ കൊണ്ട് പോകുന്ന വാഹനങ്ങളുടെ ഫ്‌ളാഗ്ഓഫ് നടത്തും. വാര്‍ഡ് അംഗങ്ങള്‍, സംഘാടക സമിതി അംഗങ്ങള്‍ എന്നിവരുടെ നേതൃത്വത്തിലാണ് പദ്ധതികള്‍ നടത്തിവരുന്നത്. 2016 ഡിസംബറിലായിരുന്നു ഒന്നാംഘട്ട പദ്ധതി വാഴക്കാട് പഞ്ചായത്ത് നടപ്പിലാക്കിയിരുന്നത്.