അങ്കമാലി: സ്‌കൂളിലെ ഗണിത-ശാസ്ത്ര പരീക്ഷണത്തിനിടെയുണ്ടായ പൊട്ടിത്തെറിയില്‍ നിരവധി വിദ്യാര്‍ഥികള്‍ക്ക് പരുക്കേറ്റു. അങ്കമാലി ഹോളി ഫാമിലി ഹൈസ്‌കൂളിലെ ഗണിത-ശാസ്ത്ര മേളക്കിടെയാണ് അപകടം. പൊട്ടിത്തെറിയെ തുടര്‍ന്ന് 55ഓളം വിദ്യാര്‍ഥികള്‍ക്ക് പരുക്കേറ്റു. ഇവരെ അങ്കമാലി ലിറ്റില്‍ ഫ്‌ളവര്‍ ആശുപത്രിയില്‍ പ്രവേശിപ്പിച്ചു. പരുക്കേറ്റ ആരുടെയും നില ഗുരുതരമല്ല.
ഗുണ്ട് അടക്കമുള്ള സ്‌ഫോടകവസ്തുക്കള്‍ ഉപയോഗിച്ച് അഗ്നിപര്‍വത സ്‌ഫോടനത്തിന്റെ മാതൃക കാണിക്കുന്നതിനിടെയാണ് അപകടമുണ്ടായത്. സ്‌കൂളില്‍ എല്ലാവര്‍ഷവും സയന്‍സ്, സോഷ്യല്‍ സയന്‍സ്, ഗണിത സ്‌കൂള്‍തല മേളകള്‍ സംഘടിപ്പിക്കാറുണ്ട്. ഇത്തരത്തില്‍ നടന്ന ഒരു മത്സരത്തിലാണ് അപകടം സംഭവിച്ചത്.
ഹൈസ്‌കൂള്‍ വിഭാഗത്തില്‍ നടന്ന മത്സരത്തില്‍ ആകെ അഞ്ച് ടീമുകളാണ് മത്സരിച്ചിരുന്നത്. രണ്ടാം ടീമിന്റെ മത്സരം ഗ്രൗണ്ടില്‍ നടക്കുമ്പോഴാണ് പൊട്ടിത്തെറിയെ തുടര്‍ന്ന് കാഴ്ചക്കാരായിനിന്ന കുട്ടികളുടെ ദേഹത്തേക്ക് കല്ലും മണ്ണും തെറിച്ചുവീണത്. വിധിനിര്‍ണയത്തിനെത്തിയ അധ്യാപിക ഉള്‍പ്പെടെയുള്ളവര്‍ക്കും പരുക്കേറ്റിട്ടുണ്ട്.